Ընդդիմադիր դաշտում ինչպիսի՞ ալյանսներ են հնարավոր, արդյոք դրանք այսօր նշմարելի՞ են: Խոսվում է «Ազատ դեմոկրատների» եւ «Ժառանգության», նաեւ ՀՅԴ-ի եւ «Ժառանգության» միջեւ հնարավոր դաշինքի մասին: «Առավոտի» այս հարցին ի պատասխան՝ կուսակցության վարչության անդամ Գառնիկ Գեւորգյանն ասաց. «Դրա մասին մի քիչ վաղ է խոսել, որովհետեւ ընդդիմադիր բոլոր ուժերը, այդ թվում՝ «Ազատ դեմոկրատները», բազմիցս հայտարարել են, որ բոլոր այդ հարցերի շուրջ քննարկումներ են ընթանում: Այնուամենայնիվ, կարծում եմ, «Ազատ դեմոկրատների» եւ «Ժառանգության» դաշինքը ձեր մատնանշածներից ամենահավանականն է զուտ գաղափարական տեսանկյունից, իսկ մյուսների հետ համագործակցությունը հնարավոր եւ ցանկալի է: Երբ խոսք է գնում դաշինքների մասին, մենք սկզբունքային ենք համարում գաղափարական ընդհանրությունները, այլապես դա դառնում է կոնյունկտուրային, իրավիճակային, բացառապես նախընտրական շահ սպասարկելուն միտված դաշինք, որը եւ ես, եւ մեր կուսակցությունն ընդունելի չենք համարում»:
«Առավոտ» օրաթերթ
