«Պետական ծառայությունների ոլորտում կոռուպցիայի դեպ պայքարի Վրաստանի փորձը հաջողության յուրահատուկ օրինակ է, որի որոշ մասեր կարող են կիրառվել պետական ծառայությունների ոլորտում համատարած կոռուպցիայի նման խնդիրներ ունեցող այլ պետություններում», – ասված է երեքշաբթի օրը Համաշխարհային բանկի կողմից հրապարակված հաշվետվությունում:
«Վարդերի հեղափոխության ժամանակից՝ 2003 թվականի վերջից, Վրաստանը մեծ հաջողություններ է ունեցել պետական ծառայության ոլորտում կոռուպցիայի դեմ պայքարի գործում», – գրում է Համաշխարհային բանկի հաշվետվությունը: – «Սակայն շատ քիչ է գրված այն մասին, թե ինչպես է հաջողվել իրականացնել այդ պայքարը»:
Հաշվետվությունում փորձ է կատարվում կոնկրետ դեպքերի ուսումնասիրության և պետական ծառայողների հետ հարցազրույցների միջոցով նկարագրել երկրում կոռուպցիայի դեմ ծավալված պայքարը, ինչպես նաև վերլուծել կառավարության, պետական ծառայություններ մատուցողների և դրանցից օգտվողների միջև ստեղծված հաշվետվողականության շրջանակը:
«Վրաստանի փորձը վկայում է այն մասին, որ «կոռուպցիան ներկառուցված է մշակույթի մեջ» արտահայտությունը չի համապատասխանում իրականությանը, և քաջալերում այլ պետությունների քաղաքականություն մշակողներին, պաշտոնատար անձանց և մտահոգված քաղաքացիներին, ովքեր նպատակ են հետապնդում ազատվել կոռուպցիայից պետական ծառայությունների ոլորտում», – նշված է Համաշխարհային բանկի հաշվետվությունում:
Կարդացեք նաև
Ամերիկայի Ձայն
