Ազգային վիճակագիրների համար ամենամտահոգիչ թեման մնում է ինքնասպանությունների բարձր ցուցանիշը: Ճիշտ է, 2010 թվականի համեմատությամբ՝ ինքնասպանությունների թիվը նախորդ տարի 30-ով նվազել է, այդուհանդերձ, Հայաստանի ազգային վիճակագրական ծառայության (ԱՎԾ) մարդահամարի եւ ժողովրդագրության բաժնի պետ Կարինե Կույումջյանը գտնում է, որ այդ թիվն էլ բարձր է:
Այսօր «Հայացք» ակումբում տիկին Կույումջյանը ներկայացրեց ժողովրդագրական իրավիճակը 2011 թ.-ին: Կ. Կույումջյանի տվյալներով. «2011 թվականին 3.1%-ով նվազել է ծնունդների քանակը` կազմելով 43 447, իսկ մահացության ցուցանիշն աճել է 0.4%-ով` կազմելով 28 030»:
Անցյալ տարի 43 հազար 447 ծնված երեխաներից 23 հազար 160-ը տղաներ են, իսկ 20 հազար 287-ը՝ աղջիկներ:
Վիճակագիրները պարզել են, որ ամենաշատը նորածիններին անվանակոչել են Մանե, Մելինե, Մարի, Էլեն, Նարե անուններով, իսկ տղաներին՝ Նարեկ, Դավիթ, Գոռ, Հայկ, Էրիկ:
Մշտական բնակչության թվաքանակն աճել է 11 700-ով եւ կազմել 3.274.300 մարդ: Տիկին Կույումջյանի խոսքերով, այս տարվա հոկտեմբերին արդեն կհրապարակվեն մարդահամարի տվյալները:
Հարցին, թե ինչպե՞ս է գնահատում մարդահամարի արդյունքները, հատկապես հաշվի առնելով, որ բնակչությունն այնքան էլ բարեհամբույր չի գտնվել ու շատ հաճախ հաշվարարների առաջ դուռ չի բացել, Կարինե Կույումջյանն ասաց, որ իրենց գործառույթների մեջ չի մտնում գնահատականներ տալը, իրենց գործը աշխատանքները կազմակերպելն է:
Անցյալ տարվա ցուցանիշներով, ամուսնալուծությունների թվով առաջատար է Լոռու մարզը: Ամուսնական զույգերն ամենաքիչը բաժանվել են Տավուշի մարզում: Ընդհանուր առմամբ, 1000 բնակչի հաշվով ամուսնալուծվում է 1-ը:
Լուսինե ԲՈՒԴԱՂՅԱՆ
