ՀՀ նախագահ Սերժ Սարգսյանի հայտարարությունը, որ գործարարությունն ու քաղաքականությունը պետք է տարանջատվեն, ՀՀԿ պատգամավոր Ռաֆիկ Պետրոսյանի սրտով է:
«Սամվել Ալեքսանյանը գործարար է, ամբողջ աշխարհը գիտի, ու իմ կարծիքով ցուցակում չի լինի»,- Aravot.am-ի հետ զրույցում իր կուսակցական գործարար պատգամավորի մասին նման կարծիք հայտնեց պարոն Պետրոսյանը: Նկատենք, որ Սամվել Ալեքսանյանը հիմա էլ է անկուսակցական, ընտրվել է մեծամասնական ընտրակարգով, եւ ընդգրկված չէ որեւէ խմբակցությունում:
Նրան հիշեցրինք իր կուսակցական գործընկերներ Արտակ Զաքարյանի եւ Լեռնիկ Ալեքսանյանի երեկվա հայտարարությունները, թե Սամվել Ալեքսանյանը գործարար չէ, այլ քաղաքական գործիչ: Ի պատասխան՝ Ռ. Պետրոսյանը նկատեց. «Դե որովհետեւ հիմա ով գործարարությամբ է զբաղվում, էն էլ խոշոր, ահագին չափերի գործարարությամբ, հրաժարվում են, ասում են, թե մենք գործարար չենք, որպեսզի մնան Հանրապետական խմբակցության մեջ, Ազգային ժողովում, որովհետեւ խորհրդարանը իրենց համար տանիք են համարում` իրենց ունեցվածքը պահելու առումով»:
Պատգամավորն ասաց, որ արդեն կա հստակ օրենսդրություն, որը նախատեսում է պաշտպանության բոլոր միջոցները. «Կարծում եմ՝ եկել է ժամանակը, որ գործարարներն այլեւս չզբաղվեն, չգան Ազգային ժողով, այլ ուղարկեն մասնագետներ` տնտեսագետ, քաղաքագետ, գիտակ մարդիկ, որոնք կգան Խորհրդարան ու իրենց շահերը կպաշտպանեն, լոբբինգ կանեն: Բացի այդ, եթե գործարարը գալիս է Ազգային ժողով, մի օր գալիս է, տասը օր չի գալիս կամ մեկ ժամ նստում ու թողնում գնում է: Գոնե նրանց ուղարկած մարդիկ կմասնակցեն նիստերին եւ իրենց կարողություններով ու գիտելիքներով կօգնեն օրենսդիրի գործունեությանը: Եթե բոլորը հրաժարվում են, որ իրենք գործարար չեն ու հանձնել են իրենց գույքը հավատարմագրային կառավարման, բայց հո կուսակցության ղեկավարությունը գիտի, որ նրանք անմիջականորեն զբաղվում են գործարարությամբ եւ պետք է նրանց չսատարեն»:
Կարդացեք նաև
Արփինե ՍԻՄՈՆՅԱՆ
