Ամանորին Ճապոնիայում կայացած «Dream» շոուի ժամանակ ռուսաստանցի Ֆյոդոր Եմելյանենկոյից գլխին ստացած սարսափելի հարվածն անհետեւանք չի մնացել ճապոնացի Սատոշի Իշիի համար:
Հարվածն այնքան ուժեղ էր, որ Իշին երկար ժամանակ չէր կարողանում ոտքի կանգնել, իսկ հետո «վանդակից» դուրս էր բերվել կողմնակի օգնությամբ եւ անմիջապես տեղափոխվել հիվանդանոց: Այնտեղ բժիշկները նրա մոտ ուղեղի ծանրագույն վնասվածք էին ախտորոշել: Հիմա արդեն` մարտից մեկ ամիս հետո, Սատոշին լիովին ապաքինվել է: Սակայն բուժող բժիշկները կտրականապես արգելել են կարիերան շարունակել մարտեր առանց կանոնների մարզաձեվում: Նրանց համոզմամբ գլխին ստացած ցանկացած ուժեղ հարված Իշիի համար կարող է ողբերգական հետեւանք ունենալ:
Ճապոնացին մինչեւ մարտեր առանց կանոնների անցնելը զբաղվել է ձյուդոյով, որտեղ, ինչպես հայտնի է, հարվածներն արգելված են: Նրա մարզական կարիերայի գագաթնակետը եղել է 2008 թվականը, երբ Պեկինի օլիմպիական խաղերում նա 100+ քաշային կարգում նվաճել է օլիմպիական ոսկին:
Աշոտ ՀԱԿՈԲՅԱՆ
Կարդացեք նաև
