ԱԺ փոխնախագահ, ՀՀԿ խոսնակ Էդուարդ Շարմազանովը խոսելով 100 տոկոսանոց համամասնական ընտրակարգին անցնելու ԲՀԿ դիրքորոշման մասին`«168 ժամ» թերթին , ասել էր. «Սա քաղաքական հնարք է, եւ այստեղ մենք տեսնում ենք խոսքի եւ գործի հստակ տարբերություն»:
ԱԺ ԲՀԿ խմբակցության պատգամավոր Նաիրա Զոհրաբյանն ի պատասխան հայտարարել է. «Խորհուրդ եմ տալիս ձեռնպահ մնալ խոսքի եւ գործի անհամապատասխանության մասին դատողություններ անելուց։ Այլապես՝ խոսքի եւ գործի անհամապատասխանության, կատարյալ անգործության ու ավելին՝ գործունեության վնասարարության այնպիսի դասական օրինակներ կան, որ, անհրաժեշտության դեպքում, կարող ենք հերթով թվարկել»։
Նաիրա Զոհրաբյանը նաեւ հորդորել էր. «Եվ երրորդ՝ մեր կոչը քաղաքական ուժերին՝ ցանկացած քննարկում ծավալել բացառապես կոռեկտ եւ քաղաքակիրթ, մնում է ուժի մեջ։ Իսկ այդ հորդորը համառորեն չհասկացողներին պատրաստ ենք իրենց իսկ գործի եւ խոսքի անհամապատասխանության մի ամբողջ ժողովածու նվիրել։ Վստահ եղեք՝ փաստերի պակաս չկա։ Միայն թե ժողովածուն կարող է բազմահատոր ստացվել»:
ՀՀԿ խմբակցության քարտուղար Գագիկ Մելիքյանը այս կապակցութամբ «Առավոտին» ասաց. «Տիկին պատգամավորն ասելիքի բացակայության պատճառով սկսել է կրկնվել եւ խորհուրդներ տալ, իսկ խորհուրդներ տալիս են նրանք, ովքեր ավելի շատ խորհուրդների կարիք ունեն: «Բազմահատորյակ» նվիրելու փոխարեն տիկին Զոհրաբյանը ճիշտ կանի գիտակցի, որ ՀՀԿ-ում միշտ էլ կգտնվի ասեղ, որը ցանկացած պահի կարող է պայթեցնել նույնիսկ քաղաքական ամենամեծ փուչիկը»:
Կարդացեք նաև
Սրա պատասխանը եւս չուշացավ: ԲՀԿ նախագահի խոսնակ Խաչիկ Գալստանն ի պատասխան Գագիկ Մելիքյանի՝ ասաց. «Քաղաքական փուչիկներ պայթեցնող համարձակներին բարեկամաբար խորհուրդ ենք տալիս չդառնալ դատարկ օդով լցված փուչիկներ, որոնք, որպես կանոն, արագորեն օդ թռչելու հատկություն ունեն»:
Մարգարիտ ԵՍԱՅԱՆ
