www.ejournal.am-ի հունվարի 26-ի Սերգեյ Դանիելյանի «Հոդված էկոլոգիայի մասին» հրապարակումը վիրավորել է լոռեցիներին ու Ֆեյսբուքի որոշ օգտատերերին: «Սերգեյ Դանիելյանից պահանջում ենք անհապաղ ներողություն խնդրել» իրադարձության մեջ մասնավորապես նշված է, որ հոդվածն իր մեջ պարունակում է Լոռու մարզի բնակիչների հասցեին լկտի ու անհիմն վիրավորական եզրակացություն: Մասնավորապես՝ խոսքը վերաբերում է «Հայաստանի Լոռու մարզի բնակչությունը այնքան է լյումպենացված, որ փողի դիմաց պատրաստ է ամեն ինչի, անգամ կարող է աչք փակել հարազատ երեխայի նկատմամբ սեռական ոտնձգությունների վրա» նախադասությանը:
«Մենք՝ ներքոստորագրյալներս, հոդվածի հեղինակից պահանջում ենք անհապաղ հրապարակային ներողություն խնդրել Լոռու մարզի բնակիչներից, հայտարարել, որ հոդվածում գրված տխրահռչակ նախադասությունը անպատասխանատու, հիմար քայլ է եղել: Հոդվածագիրը, անհիմն կերպով բարոյական անկում է վերագրել լոռեցիներին՝ դրանով իսկ վիրավորելով նրանց: Իբր թե մտահոգված իր ազգի ցավերով` նա այդ նույն ազգին անվանում է «լյումպենացված» և, ըստ էության, մեղադրում անբարոյականության մեջ: Բոլորս միահամուռ պահանջում ենք, որ նա վերանայի իր գրածը և հրապարակայնորեն ներողություն խնդրի հայ ժողովրդից, քանի որ այդ լոռեցին նույն քյավառցին է, աշտարակցին ու առհասարակ ողջ հայ ժողովուրդը»,- մտահոգություն են հայտնել նրանք:
