Վեյկ-ան-Զեեում ավարտին է մոտենում շախմատի Tata Steel Chess գերմրցաշարը: Երեկ կայացած 11-րդ տուրն առանձնացավ ինչպես անակնկալ, այնպես էլ ինչ-որ տեղ կանխատեսելի արդյունքներով:
Մրցաշարի միանձնյա առաջատար, Հայաստանի լավագույն շախմատիստ Լեւոն Արոնյանն անսպասելի պարտվեց մրցաշարային աղյուսակն անհույս եզրափակող Դավիթ Նավարային: Նախորդ տուրում 2-րդ հորիզոնական բարձրացած Վասիլի Իվանչուկը զիջեց շախմատի աշխարհի թագի հավակնորդ, իսրայելցի Բորիս Գելֆանդին: Իսկ ինչ վերաբերում է Ադրբեջանի ներկայացուցիչներ Վուղար Հաշիմովին եւ Թեյմուր Ռաջաբովին, նրանց դիմակայությունում «հաջողության հասավ» առաջատարների շարքում ընթացող Ռաջաբովը: Հաշիմովի, ասես, պատվերով պարտությունը մտածել է տալիս, որ կողմերը լավ հասկանում էին, որ վերջնական արդյունքի տեսանկյունից Ռաջաբովին այդ մեկ միավորն օդի պես էր հարկավոր:
Չնայած կրած պարտությանը՝ Լեւոն Արոնյանը շարունակում է պահպանել միանձնյա առաջատարի դիրքերը:
1. Լեւոն Արոնյան 7,5միավոր
Կարդացեք նաև
2. Մագնուս Կարլսեն 7,0
3. Թեյմուր Ռաջաբով 7,0
4. Վասիլի Իվանչուկ 6,5
5. Ֆաբիանո Կարուանա 6,5
6. Հիկարու Նակամուրա 6,0
7. Գատա Կամսկի 5,5
8. Սերգեյ Կարյակին 5,5
9. Լյուկ-Վան-Վելի 5,0
10. Բորիս Գելֆանդ 5,0
11. Վուղար Հաշիմով 4,5
12. Անիշ Գիրի 4,5
13. Վեսելին Տոպալով 4,5
14. Դավիթ Նավարա 3,5
Այսօր 12-րդ տուրում Արոնյանը սեւերով խաղում է Գելֆանդի հետ, Ռաջաբովը՝ Իվանչուկի, Կարլսենը՝ Կամսկու հետ:
ԱՇՈՏ ՀԱԿՈԲՅԱՆ
«Առավոտ» օրաթերթ
Լուսանկարները` chess-news.ru-ի:
