Գործարար Սիլվա Համբարձումյանը մեր զրույցում ասել էր , որ ինքը, որ կուսակցություն էլ գնա` կընդունեն: Ավելին` նա այս օրերին ուսումնասիրում է կուսակցությունների գաղափարախոսությունները, որ ընտրի, թե ում հետ քայլի` չբացառելով նաեւ, որ կարող է մտնի ՀՀԿ: Նա այս ընթացքում հրավիրած ասուլիսներում բազմիցս համոզմունք է հայտնել, որ պատգամավոր դառնալը փողի խնդիր է միայն, իսկ ինքը բավականաչափ փող ունի:
Այսօր ԲՀԿ անդամ Վարդան Բոստանջյանը Aravot.am-ի հետ զրույցում ասաց, որ Սիլվա Համբարձումյանին իրենց կուսակցությունում նայելու են, ինչպես շարքային մի քաղաքացու, որը կուզենա անդամագրվել ԲՀԿ-ին:
ՀՀՇ վարչության եւ ՀԱԿ անդամ Հովհաննես Իգիթյանը պարզապես Սիլվա Համբարձումյանին տեղեկացրեց, որ իրենց կուսակցություն հոգով են ընդունվում. «Մենք Սիլվա Համբարձումյանի ծառայությունների պահանջ չունենք, ՀՀՇ չեն մտնում ծառայություններ մատուցելու, մտնում են, որովհետեւ ընդունում են գաղափարները, հատկապես, որ այս իրավիճակում, երբ վտանգավոր է ՀՀՇ–ական լինել, որովհետեւ գործը կտուժի, ընտանիքը կարող է տուժի: Այդ առումով մենք համոզված ենք, որ ՀՀՇ հոգով են ընդունվում, դա Հանրապետական կուսակցություն չէ, որ շահադիտական պատճառներով են ընդունվում` ծառայություն մատուցելու եւ ստանալու համար»:
Կարդացեք նաև
Հիշեցնենք, որ ավելի վաղ ՀՀԿ անդամ Գագիկ Մինասյանը նույնպես ասել էր, որ իրենք Սիլվա Համբարձումյանի ծառայությունների կարիքը չունեն: Այսպիսով, Սիլվա Համբարձումյանի ընտրության շրջանակը գնալով նեղանում է:
Հռիփսիմե ՋԵԲԵՋՅԱՆ
