Մեծ Բրիտանիայի արտակարգ եւ լիազոր դեսպան Քեթրին Լիչը պատմում է շոտլանդացի աշխարհահռչակ բանաստեղծ Ռոբերտ Բըրնսի մասին: Նրան թարգմանում է դեսպանատան հասարակայնության հետ պատասխանատու Մարիա Սադոյանը՝ ՀՀ-ում Մեծ Բրիտանիայի նախկին դեսպան Չարլզ Լոնսդեյլի տիկինը:
Մեջտեղում Շոտլանդիայից ժամանած խոհարարն է՝ իր պատրաստած հագիսի հետ:
Այս տարի արդեն 14-րդ անգամ Հայաստանում կկազմակերպվի Բըրնսի ընթրիքը: Շոտլանդացի աշխարհահռչակ բանաստեղծ Ռոբերտ Բըրնսին նվիրված երեկույթը շոտլանդացիների համար ազգային տոն է, որը նշվում է ոչ միայն Շոտլանդիայում եւ Մեծ Բրիտանիայում, այլեւ՝ աշխարհի շատ երկրներում, որտեղ Միացյալ թագավորությունը դեսպանություն ունի:
Շոտլանդիայից ժամանած պարկապզուկահարը եւ միջոցառման հովանավորներից մեկի՝ bmi-ի ներկայացուցիչը
Ավանդույթի համաձայն՝ Բըրնսի ընթրիքից մի քանի օր առաջ Շոտլանդիայից հանդիսավոր կերպով բերվում է հագիսը՝ շոտլանդական ազգային սառը խորտիկը, որն իրենից ներկայացնում է ոչխարի ստամոքսի մեջ լցոնված փորոտիք, որը տվյալ երկրում Մեծ Բրիտանիայի դեսպանին է հանձնում հագիսը պատրաստած խոհարարը, որը նույնպես ժամանել է Շոտլանդիայից՝ պարկապզուկահարի հետ միասին: Բնականաբար, հագիսի պատվավոր հանձնումն էլ ուղեկցվում է շոտլանդական պարկապզուկի երաժշտությամբ:
Հայաստանում այս տարի հագիսը հանձնվեց Հայաստանում Մեծ Բրիտանիայի արտակարգ եւ լիազոր դեսպան Քեթրին Լիչին՝ երերկ Գաֆեսճյան արվեստի կենտրոնի Խանջյան սրահում կայացած արարողության ժամանակ: Իսկ վաղը կկայանա Բըրնսի երեկույթը, որի ընթացքում աճուրդի, վիճակահանության եւ այլ եղանակներով գումարներ կհավաքվեն բարեգործական եղանակով:
Ինչպես տեղեկացրեց Մեծ Բրիտանիայի դեսպանատան հաղորդակցության հարցերով պատասխանատու Մարիա Սադոյանը՝ նախորդ տարի կայացած Բըրնսի Ընթրիքի ընթացքում հաջողվել է հավաքագրել 27 000 ԱՄՆ դոլարին համարժեք հանգանակություն, որի շնորհիվ իրականացվել են տարբեր բարեգործական ծրագրեր:
