Մոտ մեկ ամիս է՝ կրկեսի հարեւանությամբ նախկին հեծանվահրապարակի քանդման աշխատանքներ են կատարվում:
Այսօր հեծանվահրապարակից բետոնե 2-3 սյուներ էին մնացել: Տարածքում աշխատող բանվորները շինարարական աղբն էին հեռացնում, տարածքը հարթեցնում եւ փոքրիկ ծառերի ճղները սղոցում:
Նախկին հեծանվահրապարակի տարածքը ներկայումս պատկանում է իտալական «Ռենկո» ընկերությանը: Ըստ որոշ լուրերի, իտալացի բիզնեսմենները պատրաստվում են այդ տարածքում կառուցել բազմաբնակարան էլիտար շենք՝ իր համալիրով, սակայն «Ռենկոյի» պատասխանատուներն առայժմ չեն ցանկանում այդ մասին հրապարակել որեւէ մի տեղեկություն:
Aravot.am-ի հարցին, թե հեծանվահրապարակի տարածքում ի՞նչ է կառուցվելու, «Ռենկոյից» պարզաբանեցին, որ «դեռ օֆիցիալ ոչ մի բան չկա, ինչ էլ կա՝ ընդամենը գաղափարներ են»:
Եթե իտալացիների ընտրությունն այնուամենայնիվ կանգ առնի էլիտար շենքի ու համալիրի վրա, ապա, մայրաքաղաքի այդ հատվածում, կարելի է ասել, կձեւավորվի իտալական «մինի» թաղամաս: Նշենք, որ այդտեղ արդեն առկա է մեկ բնակելի շենք, որի բնակիչների հիմնական մասը իտալացիներ են: Այդ տարածքին հարակից գտնվում է նաեւ Հայաստանում Իտալիայի դեսպանատունը, քիչ այն կողմ էլ՝ իտալացիներին պատկանող «Կոնգրես» հյուրանոցը:
Լուսինե ԲՈՒԴԱՂՅԱՆ
