Տավուշի մարզպետ Արմեն Ղուլարյանը մարզպետարանի աշխատակազմին ասել է, որ Բերդում բժիշկների պակաս կա, բուժանձնակազմը ծերացել է, ինչը խնդիրներ է ստեղծում նախազորակոչային եւ զորակոչային տարիքի պատանիների լիրաժեք բուժզննման համար: Բերդի բժշկական կենտրոնը չունի քիթ-կոկորդ ականջի մասնագետ, անզգայացնող եւ ռենտգեն նկարահանում կատարող բժիշկներ, իսկ նյարդաբանը, վիրահատող գինեկոլոգը 70-անց են: Հիվանդանոցն արդեն 6 տարի գինեկոլոգ չունի: Բժշկական կենտրոնի տնօրեն Արամ Հարությունյանի խոսքով, բժիշկների աշխատավարձը պայմանագրային է, գոյանում է հաստիքավճարից եւ կատարած ծառայությունների քանակից, աշխատավարձի գումարը բավարար է: Սակայն բժշկական համալսարան ավարտած, Բերդի տարածաշրջանից սերված երիտասարդները ուսումնառությունից հետո մնում են Երեւանում, իսկ այլ տեղերից հեռավոր, սահմանամերձ Բերդ աշխատանքի չեն գալիս:
Բերդի բժշկական կենտրոնը զբաղվածության տարածքային կենտրոնի միջոցով հայտարարություն է տարածել, որով աշխատանքի է հրավիրում քիթ-կոկորդ-ականջաբանի, ռենտգենոլոգի, նյարդաբույժի, սոնոգրաֆիստի, մանկաբույժի եւ հոգեբույժի:
Այս տարի Համաշխարհային բանկի 1,5 միլիոն դոլար ֆինանսավորմամբ, Բերդի հիվանդանոցի շենքը հիմնանորոգվելու է, հագեցվելու գույքով եւ բժշկական նոր սարքավորումներով:
Ոսկան ՍԱՐԳՍՅԱՆ
