«Ճիշտ» հոդվածների կողմնակից Ալի Նիհատ Յազիչին
«e3e5» շախմատային կայքը տպագրել է իտալացի կին լրագրող Յանիս Նիզյիի բաց նամակը` ուղղված Իտալիայի շախմատի ֆեդերացիային, ՖԻԴԵ-ին ու Եվրոպայի շախմատային միությանը, որում հեղինակը տեղեկացնում է, որ վերջերս անցկացված «Ռեջիո-Էմիլիա» մրցաշարի կազմակերպիչներն իրեն չեն հավատարմագրել այն բանի համար, որ անցած տարի նույն մրցաշարից իր հոդվածներն ու մեկնաբանություններն իրենց դուր չեն եկել:
Լրագրողը, որ պատրաստվում էր կատարել հոլանդական ճանաչված «News in Chess» շախմատային հանդեսի հանձնարարությունը, ցանկանում է իմանալ վերոնշյալ շախմատային կազմակերպությունների ղեկավարների կարծիքը կատարվածի մասին:
Արձագանքելով լրագրողի հարցադրմանը` «Chess-News.ru»-ն հիշում է, որ իրենք եւս բախվել են նման խնդրի հետ, երբ Թուրքիայի շախմատային ֆեդերացիայի նախագահ Ալի Նիհատ Յազիչիին նույնպես դուր չէր եկել կայքում հրապարակված այն նյութը, որում ասվում էր, թե աշխարհի մի շարք առաջատար հավաքականներ տրամադրված են բոյկոտել կանանց աշխարհի թիմային առաջնությունը: Դրա համար Յազիչին «Ռեջիո Էմիլիայի» կազմակերպիչներից առաջ էր անցել եւ կայքին սպառնացել, թե «Chess-News.ru»-ին կարգելվի աշխատել Թուրքիայի տարածքում անցկացվող մրցաշարերում:
Աշոտ ՀԱԿՈԲՅԱՆ
