Այսօր «Սիվիլիթաս» հիմնադրամը քննարկում էր կազմակերպել նախկին ՀՀՇ-ական, այժմ՝ «Ազատ դեմոկրատներ» կուսակցության անդամ Ալեքսանդր Արզումանյանի հետ:
«Ես ՀԱԿ-ի անդամ չեմ եղել,- քննարկման ընթացքում պարզաբանեց նա:- Երբ ՀԱԿ-ը ստեղծվում էր, ես եղել եմ «Երեւան-Կենտրոն» ՔԿՀ-ում, ես ողջունել եմ: Ես, որպես քաղբանտարկյալ, ողջունել եմ ՀԱԿ-ի ստեղծումը: Անշուշտ, դա նոր էտապ էր շարժման համար: Ես եղել եմ Լեւոն Տեր-Պետրոսյան թեկնածուի շտաբի պետը, կազմակերպել եմ նախընտրական աշխատանքները եւ կարծում եմ, որ լավ է աշխատել շտաբը, մենք գտնում ենք, որ հաղթել ենք: Դրանից հետո շարժման ղեկավարությունը որոշել է այլ ֆորմատ ձեւավորի: Եղել են տարաձայնություններ, եղել ենք ազատական գաղափարախոսության կողմնակիցը, գտել ենք, որ այն ներկայացված չէ ընդդիմադիր դաշտում ու որոշել ենք լրացնել այդ բացթողումը»:
Ալեքսանդր Արզումանյանը նշեց, որ նախընտրական շրջանում հատուկ է միմյանց պիտակներ կպցնելը, ուստի հարցին` պիտակներ կլինե՞ն` հաճախորդ, պրոեկտ եւ այլն` նա պատասխանեց. «Արդեն իսկ կան, պիտակավորելը չեմ կարծում, որ հարիր է նորմալ քաղաքացուն, մենք լսել ենք, որ քաղաքականությունն անբարոյական զբաղմունք է, բայց դրանով քողարկում ենք մեր անձնական անբարոյականությունը: Այն, որ մեզ պիտակավորում են, ցույց է տալիս, որ մեզնից վախենում են, ոչ թե սլաքն ուղղում են բռնատիրական ռեժիմի դեմ, այլ` իրենց համախոհների, 20 տարվա ընկերների դեմ: Դա, կարծում եմ, այնքան էլ արդյունավետ չէ, ժամանակը կգա, դա կգիտակցեն այն տեխնոլոգները, որոնք խորհուրդներ են տալիս: Մենք չենք քննադատելու ընդդիմադիր դաշտի որեւէ գործողությունը: ՀՅԴ-ի, կամ ՀԱԿ-ի հետ կռիվ չունենք, ունենք մեր ձայներին տեր կանգնելու խնդիր»:
Հռիփսիմե ՋԵԲԵՋՅԱՆ
Կարդացեք նաև
