Այսօր շատերն են բողոքում գովազդի առատությունից եւ ասում, որ խորհրդային տարիներին գովազդ չկար: Սակայն դա այնքան էլ ճիշտ չէ, քանի որ որոշ տեղերում մինչ այսօր էլ պահպանվել են խորհրդային «Շահավետ է դրամը խնայդրամարկղում պահելը», «Շահավետ է կյանքի եւ գույքի ապահովագրությունը» լոզունգները, որոնք, կարծում եմ, հենց գովազդ են: Սակայն հիմա գովազդի մասին չէ, որ ուզում եմ խոսել, այլ խորհրդային գովազդի «մարգարեական» լինելու մասին:
Խորհրդային տարիներին Երեւանի Մաշտոցի պողոտայում՝ Փակ շուկայի դիմաց գտնվում էր «Հայխնայբանկի» մասնաճյուղ, իսկ այդ շենքի տանիքին էլ՝ վերոնշյալ լոզունգներից մեկը: Այն մինչ օրս պահպանվել է, միայն թե՝ մի փոքր այլ տեսքով. առաջին երկու տառերը պոկվել են ու մնացել է «հավետ է…», ինչը, ավանդների վերադարձման գործընթացից դատելով՝ զուտ իրականություն է:
Ա. ԳԱՐԵԳԻՆՅԱՆ
«Առավոտ» օրաթերթ
