«Տեղեկատվական համակարգերի զարգացման եւ վերապատրաստման կենտրոն» հասարակական կազմակերպությունը անցած մեկ ամսում փորձել է պարզել, թե որոնք են տեղական ինքնակառավարման մարմինների՝ ՏԻՄ-երի կողմից ժամանակակից տեղեկատվական տեխնոլոգիաների կիրառման հիմնական խոչնդոտները: Կազմակերպված հարցմանը կարող էր մասնակցել ինտերնետից օգտվող ցանկացած քաղաքացի: ՏԻՄ-երի համար մտահոգիչ պատկեր է ստացվել:
Հարցման մասնակիցների 28,57 տոկոսը ասել է, որ Տեղական ինքնակառավարման մարմինների կողմից նորագույն տեխնոլոգիաների կիրառման հստակ քաղաքականություն չկա, 21,43 տոկոսը կարծում է, որ համայնքի ղեկավարի կողմից նորագույն տեխնոլոգիաներով աշխատելու ցանկություն եւ պատրաստակամություն չկա, նույնքան մարդ էլ վստահ է, որ համայնքապետարանների աշխատակիցների համակարգչից եւ ինտերնետից օգտվելու գիտելիքների եւ հմտությունների պակաս կա: Միայն 7 տոկոսն է կարծում, որ ՝ ՏԻՄ-երում ժամանակակից տեղեկատվական տեխնոլոգիաների կիրառման հիմնական խոչնդոտը օրենսդրական դաշտի անկատարությունն է:
