Հաղորդել էինք, որ ԵԽԽՎ-ում հունվարի 25-ին Բելառուսում իրավիճակի քննարկման ժամանակ Հայաստանի պատվիրակությունում ԲՀԿ խմբակցության ներկայացուցիչ Նաիրա Զոհրաբյանի ելույթից հետո զեկուցողը հայտնեց իր անհամաձայնությունը: Մանրամասնենք, որ զեկուցողը՝ Էստոնիայի պատվիրակ Անդրես Հերկելը մասնավորապես ասաց, որ ցանկանում է իր փաստարկները ներկայացնել արտահայտված որոշ քննադատական տեսակետների առնչությամբ եւ հավելեց. «Թույլ տվեք ասել պարոնայք Ֆեդերով, Սլուցկի եւ տիկին Զոհրաբյան, որ պատժամիջոցների վերաբերյալ ձեր մեկնաբանությունը մոլորեցնող է: Թույլ տվեք եւս մեկ անգամ ընդգծել, որ որ մենք խոսում ենք պատժամիջոցների մասին, որոնց թիրախը ոչ թե ժողովուրդն է, այլ նրանք, ովքեր կեղեքում են ժողովրդին: Առաջատար քաղաքական գործիչները, նույնիսկ Ռուսաստանում եւ Հայաստանում, պետք է խոստովանեն, թե Բելառուսում Լուկաշենկոն է, որ դեմ է ժողովրդին»:
Հիշեցնենք, որ Նաիրա Զոհրաբյանը մասնավորապես ասել էր. «Հարգարժան Հերկելն իր զեկույցում կոչ է անում ուժի մեջ պահել այդ երկրի հանդեպ գործող սանկցիաները։ Մինչդեռ ինձ մի պարզ ճշմարտություն է հայտնի՝ ցանկացած սանկցիա բումերանգի էֆեկտ ունի, եւ ցանկացած սանկցիա միշտ աշխատում է ժողովրդի դեմ»:
