Ֆրանսիայի խորհրդարանի Վերին պալատի՝ Սենատի ընդունած որոշումը՝ ցեղասպանությունների ժխտումը քրեականացնող օրինագծի վերաբերյալ, կրկին անգամ ապացուցեց ֆրանսիական ժողովրդի եւ պետության պատրաստակամությունը՝ պաշտպանելու համամարդկային արժեքները, որոշում, ինչը կարեւորագույն քայլ է աշխարհում ցեղասպանությունների կանխարգելման գործում: Ճանաչելով Հայոց ցեղասպանությունն ու քրեականացնելով ցեղասպանության ցանկացած հերքում՝ Ֆրանսիայի խորհրդարանի Վերին պալատը, ըստ էության, ամբողջ աշխարհին հայտարարեց, որ ինչպես ներքին, այնպես էլ արտաքին քաղաքականության ընթացքում նա հավատարիմ է համամարդկային արժեքներին, բարոյականության նորմերին եւ արդարությանը: Այն, որ որոշումն ընդունվել է Ֆրանսիայի 2 պալատներում, որտեղ ներկայացված են քաղաքական տարբեր ուժեր, ապացուցում է, որ սա ֆրանսիական ժողովրդի կամքի արտահայտությունն է: Մենք համոզված ենք, որ այս կարեւորագույն քայլը խթան կհանդիսանա ինչպես Եվրոպայում, այնպես էլ աշխարհի տարբեր երկրներում Հայոց ցեղասպանության ճանաչմանն ու դատապարտմանը: ՕԵԿ-ի հարյուր հազարավոր անդամներն ու համակիրները՝ հայ ժողովրդի եւ բարի կամք արտահայտող աշխարհի տարբեր ժողովուրդների հետ միասին, կշարունակեն պայքարել ինչպես Հայոց ցեղասպանության ճանաչման, այնպես էլ աշխարհում ցեղասպանությունների՝ որպես անմարդկային երեւույթների կանխարգելման ուղղությամբ:
ՕԵԿ մամուլի ծառայություն
«Առավոտ» օրաթերթ
