Մամուլում քննարկումների տեղիք էր տվել այն, որ ԲՀԿ նախագահ Գագիկ Ծառուկյանը ադամանդակուռ շղթայով հովազի արձան էր նվիրել ՀՀ նախագահ Սերժ Սարգսյանին: Այդ նույն նվերից ժամանակին ստացել էր նաեւ ՀՀ էքս նախագահ Ռոբերտ Քոչարյանը: Քննարկումների հիմնական թիրախն այն էր, թե ՀՀ բարձրաստիճան պաշտոնյաներն իրավունք ունե՞ն այդպիսի թանկարժեք նվերներ ընդունել, հաշվի առնելով, որ նրանց թույլատրելի նվերի շեմը 100 հազար դրամ է:
Հանրային խորհրդի անդամ Արշակ Սադոյանին խնդրեցինք մեկնաբանել, թե ինչպե՞ս պետք է վարվեին նախագահները այդտեսակ նվերների հետ` նա ասաց, որ անձամբ այդ նյութերին ծանոթ չէ, բայց, սեփական օրինակից ելնելով, գտնում է, որ այդ լուսանկարները, որտեղ պատկերված է նվերը տալու պահը, չի բացառվում, որ «սարքած» լինեն. «Youtube-ում դրված է մի տեսահոլովակ, որտեղ ես հայհոյում եմ Ազգային ժողովում, դրանից հետո էլ այնտեղ ծափահարում են այդ հայհոյանքներին, բայց իրականում նման բան չի եղել, դա ամբողջությամբ ժամանակակից տեխնոլոգիայով մոնտաժված է, եւ ես հիմա չեմ կարող ասել` այդ նկարներն իսկակա՞ն են, թե՞ իսկական չեն: Հանրապետության նախագահի, վարչապետի նվերների հարցը կարգավորվում է օրենքով, եւ բնական է, որ եթե նման նվեր ստացած լինեն` պետք է անեն այն, ինչ օրենքով նախատեսված է, դե էնտեղ թանգարան հանձնել է, բան է…»:
Իսկ Հանրային խորհրդի մեկ այլ անդամ` ԳԱԱ ակադեմիկոս Ռոբերտ Աթոյանը, կարծում է, որ օրենքը սահմանափակում է դնում միայն պաշտոնական նվերների մասով, իսկ ծնունդին, կնունքին, Նոր տարվա առիթով ով ինչ ուզի` կարող է նվիրել. «Օրենքի տեսակետից, կարծում եմ, դա թույլատրելի է, այլ հարց է, որ էթիկայի տեսանկյունից նա կարող է չվերցնել այդ նվերը»:
Հռիփսիմե ՋԵԲԵՋՅԱՆ
Կարդացեք նաև
