Ինչպես արդեն տեղեկացրել ենք, այսօր՝ հունվարի 24-ին, Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում սկսվել էր դերասանուհի Անժելա Սարգսյանի անձնական կյանքին վերաբերող տեղեկությունները, այդ թվում՝ լուսանկարներ և տեսանյութեր, համացանցում տարածած Կարեն Արայանի դատավարությունը։
Դատական նիստի ժամանակ Կ. Արայանի պաշտպան Արթուր Ղարիբյանը միջնորդություն էր ներկայացրել դատարանին, որպեսզի իր պաշտպանյալը գրավով ազատ արձակվի։ Փաստաբանի միջնորդությանը դեմ հանդես եկավ ՀՀ գլխավոր դատախազության ներկայացուցիչ Վահե Հովհաննիսյանը։ Դատավորը խորհրդակցական սենյակից վերադառնալուց հետո որոշեց միջնորդությունը մերժել՝ պատճառաբանելով, որ դեռ դատաքննության ընթացքում պետք է լսվեն կարևոր վկաներ, իսկ դրսում լինելով ամբաստանյալը կարող է ճնշում գործադրել նրանց նկատմամբ։
Այսօրվա դատական նիստին ցուցմունք է տվել ամբաստանյալը։ Դատական նիստը հետաձգվեց և նշանակվեց փետրվարի 13-ին՝ ժամը 11.30-ին։ Դատարանի շենքում էր նաև Կարեն Արայանի մայրը՝ Մարինան, ով հրաժարվեց խոսել լրագրողների հետ՝ հայտնելով, որ իր բոլոր հարցերի պատասխանները կարող է տալ միայն Անժելա Սարգսյանը։ Նա ասել է` «ցանկություն ու տրամադրություն չունեմ խոսելու»։
Կարդացեք նաև
Ի դեպ, ամբաստանյալ Կ. Արայանը հանցագործ աշխարհում հայտնի, նախկին «օրենքով գող» Շուրիկի որդին է։
