Շնորհավորում եմ ֆրանսիացիներին, ֆրանսահայերին և առաջադեմ մարդկությանը Ֆրանսիայի Սենատի կողմից ընդունված այս պատմական որոշման առթիվ:
Հայ-ֆրանսիական բարձր մակարդակի հարաբերությունները, ֆրանսահայերի համախմբված, համառ և հետևողական պայքարը, ինչպես նաև Ֆրանսիայի Նախագահի հաստատակամությունն ու վճռականությունը պսակվեց փայլուն հաղթանակով:
Թուրքիայից եկող սպառնալիքները, վիրավորանքները չազդեցին Սենատի որոշման վրա: Իրավական և ժողովրդավարական պետության համար առաջնային են մարդու իրավունքները և մարդկության դեմ կատարված հանցագործությունները այլևս չկրկնվելու պահանջը:
Հայոց Ցեղասպանության մասին օրենքների, քաղաքական որոշումների ընդունումը լայնախոհ և առաջադեմ պետությունների և ժողովուրդների գործն է, ովքեր շահագրգռված են մարդկության անվտանգ ապագայով:
Կարդացեք նաև
Այսօր հարյուր հազարավոր հայեր, որոնք պատմական ճակատագիր և պատմական հիշողության կրողներ են, հպարտ են իրենց ֆրանսիական ծագմամբ և ֆրանսիական քաղաքացիությամբ:
Համոզված եմ, որ ֆրանսիական պետության օրինակը վարակիչ կդառնա եվրոպական մյուս երկրների համար: Աշխարհը մի օր Հայոց Ցեղասպանության համընդհանուր ճանաչման միջոցով պիտի ասի իր վճռական խոսքը` «Այլևս` երբե՛ք»:
Մենք հանձնառու ենք նախանձախնդրությամբ ուսումնասիրելու ֆրանսիական փորձը և այն տարածելու եվրոպական մյուս հայ համայնքներում:
Մերսի Ֆրանսիա,
Մերսի ֆրանսիական պառլամենտի անդամներ,
Մերսի սիրելի ֆրանսահայեր:
Հայաստանի Հանրապետության
սփյուռքի նախարար Հրանուշ Հակոբյան
