Այսօր «Ազդակ» ակումբում հոգեբան Կարինե Նալչաջյանը խոսեց աղանդավորական շարժումների եւ դրանց հետեւանքների, նաեւ 2012թ.-ի ընտրություններին ընդառաջ ժողովրդի բարոյահոգեբանական վիճակի ու տրամադրությունների մասին:
«Աղանդավորական շարժման անդամները, մասնակիցները ապակյա մի հայացք նետելով՝ անհատին ճզմում են, մարդու հոգեբանության, տրամաբանության վրա ազդելով դարձնում են իրենց անդամ: Շարժումից դուրս գտնվող մարդկանց նրանք համարում են թշնամիներ, անհավատներ, անգամ այդ մարդիկ տվյալ անձի ընտանիքի անդամներն են: Շատ հայ ընտանիքների ամուր կառույցը քանդվում է հենց այս սարսափելի աղանդների պատճառով: Բոլորը, կամա թե ակամա, հնազանդվում եւ լսում են շարժման պարագլխին, առանց որի՝ ապրել այլեւս չեն կարողանում, իսկ եթե այդ «հրամանատարը» մահանում է, աղանդավորական շարժման անդամները իրենց կյանքը ավարտված են համարում»,- փաստեց հոգեբանը:.
Մասնագետի խոսքով. «Այսօր մարդիկ խուսափում են խոսել աղանդավորների մասին: Պետք է դեմն առնել այդ անտանելի շարժումների ու միայն եկեղեցին անզոր կլինի դրանց դեմ պայքարել»:
Տիկին Նալչաջյանը ասուլիսի ընթացքում կտրուկ անցում կատարեց նաեւ ընտրությունների թեմային:
Կարդացեք նաև
Նրա կարծիքով. «Հասարակության մեծ մասը հոգեբանորեն պատրաստ է գնալ ընտրությունների, բայց նրանց մեկ երրորդը տեղում` քվեատուփի առաջ է իր վերջնական որոշումը կայացնում: Սկզբում նա համակրում է մեկին, որոշում է ընտրել 2-ին, եւ ի վերջո քվեարկում է 3-ի օգտին: Իրականում նախընտրական եռուզեռը միայն քաղաքական ներկայացուցիչների մեջ է, ժողովրդին չի հետաքրքրում»:
Հոգեբանն ինչ-ինչ կերպարներ էլ առանձնացրեց. «Նախընտրական շրջանում ակտիվանում են սպասումները, իմ կարծիքով, դրանք առաջացնում են մի քանի կերպարներ, որոնք են` իմաստունի, ռազմիկի, կերակրող հոր և հանուն արդարության պայքարող մարդու: Կերակրող հայրը` Գագիկ Ծառուկյանն է, Սերժ Սարգսյանը` իմաստունը, «Օրինաց երկիրը», «Ժառանգությունն» ու դաշնակցականներն էլ արդարության մարտիկներ են»:
Անժելա ՇԱՀՈՒՄՅԱՆ
