Հունվարի 12-ին « Չորս մարզ թերանում է» հրապարակմամբ տեղեկացրել ենք, հունվարի 11-ին տարածքային կառավարման նախարար Արմեն Գեւորգյանը եւ մարզպետներն այս տարվա առաջին խորհրդակցությունն են անցկացրել եւ խոսել հողօգտագործողներին մատչելի գներով ազոտական պարարտանյութի ձեռքբերման նպատակով պետական աջակցության ծրագրից, նաեւ սերմնաբուծության եւ սերմարտադրության ծրագրի արդյունքներից: Երկրորդ ծրագիրը, ըստ նախարարության, ընդհանուր առմամբ հաջողությամբ է իրականացվում, բայց Արագածոտնում, Արմավիրում, Գեղարքունիքում եւ Տավուշում, սերմացուի վերադարձելիության մակարդակը բավարար չէ: Մարզպետները նախարարից հանձնարարություն էին ստացել այս ոլորտում քայլեր ձեռնարկել:
Տավուշի համայնքներին ՀՀ կառավարությունը տրամադրել էր 79 տոննա գարու և 19 տոննա եգիպտացորենի սերմացու: Տավուշի մարզպետարանի գյուղատնտեսության եւ բնապահպանության վարչության պետ Ռազմիկ Մելիքջանյանը հայտնեց, որ ստացած սերմացուի համար Հաղթանակ համայնքը դեռեւս պարտք է 420 հազար, Կողբը` 400 հազար, Նորաշենը` 1,5 միլիոն, Արծվաբերդը 700 հազար, Դեղձավանը 140 հազար դրամ, այլ համայնքներ պարտք են ավելի փոքր գումարներ: Գյուղավարչության պետը համայնքների ղեկավարներին զգուշացրել է` եթե մի քանի օրում գումարները չվերադարձվեն, կիրառվելու են տուգանքներ:
Ոսկան ՍԱՐԳՍՅԱՆ
