Լուրեր են շրջանառվում, որ երգչուհի Արմինկան իր ընկերուհու` Շպռօտի պես խնդիրներ ունի եւ հետապնդվում է մեր շոու բիզնեսի կնքահայր-կնքամայրերի կողմից: Ըստ լուրերի, նա հայկական շոու բիզնեսից քիչ-քիչ արտաքսվում է:
Aravot.am-ը Արմինկայից փորձեց ճշտել, թե շրջանառվող լուրերը համապատասխանո՞ւմ են իրականությանը: Նրա խոսքերով` «Ես, անկեղծ ասած, չեմ ճանաչում ո’չ կնքահայրերին, ո’չ էլ կնքամայրերին, գուցե կան աներեւույթ ուժեր, ովքեր կառավարում են այս ամեն ինչը, բայց ինչ վերաբերում է հետապնդելուն` գուցե այդքան շատ չեմ երեւում եւ այդքան շատ մեծ ծրագրերի մեջ չկամ, ինչքան որ ուրիշները, դա ունի իր բացատրությունը: Ուղղակի այսօր, ցավոք այսպիսի չգրված օրենք կա փոփ ժանրում եւ ոչ միայն այդ ժանրում` ընդհանրապես ամենուրեք, որ ովքեր ունեն հայերեն լեզվով ասած` մեջք, ակնհայտ է, որ էդ մարդիկ մի քիչ ավելի շատ են երեւում, սա է խնդիրը: Այդ ամենը կապված է կա’մ պետական, կա’մ որեւէ անձական հովանավորության հետ, որը ես չունեմ եւ չեմ էլ ուզում ունենալ: Ես միշտ եղել եմ իմ գործն անող եւ իմ գործով ինչ–որ բան ապացուցող, ոչ թե հաղթանակներ եմ ձեռք բերում ինչ–որ մարդկանց զանգերի կամ աջակցությունների շնորհիվ»:
Մեր դիտարկմանը` անկախ ձեր խոսքերից եւ հավաստիացումներից`, միեւնույն է, հասարակությունը ձեր անունը այս կամ այն անունների հետ շրջանառում է` Արմինկան պատասխանեց. «Ո՞ւմ նկատի ունեք: Գիտեք ինչ, եթե ես պետք է մեջքի շնորհիվ ինչ–որ ծրագրում մասնակից լինեմ կամ որեւէ մրցանակաբաշխության ժամանակ շատ լավ մրցանակ ստանամ` էդ ինձ համար ծիծաղելի է: Ես այդ որակի մարդ չեմ, որ ինչ–որ մեկի զանգի կամ ասելու արդյունքում ինչ–որ բան ստանամ: Ես իմ աշխատանքն եմ անում: Ինձ համար իմ երկրպագուների բանակի քանակն է կարեւոր, եւ ոչ թե մի քանի ավել մրցանակ եւ մի քանի անգամ ավելի հեռուստաեթերում երեւալը, ես էդ որակը չեմ, դա ինձ շատ խանգարում է, այո, բայց չեմ պատրաստվում այդպես ապրել, ինչպես մյուսները»:
Մենք նաեւ հետաքրքրվեցինք, թե Ալեքսը չի՞ խանգարում երգչուհուն` ակտիվ գործունեությամբ զբաղվել, Արմինկան վստահեցրեց, որ ոչ. «Երեխաս արդեն այնքան մեծ է, որ ես ինձ թույլ եմ տալիս ավելի շատ աշխատել: Բայց, իհարկե, ժամանակիս մեծ մասը երեխային է տրամադրված, չնայած ես հասցրել եմ ձայնասկավառակ թողարկել,2 տեսահոլովակ նկարահանել ու բազմաթիվ համերգներ ու հյուրախաղեր եմ ունեցել անցյալ տարի»:
Կարդացեք նաև
Հռիփսիմե ՋԵԲԵՋՅԱՆ
