2011 թվականի հուլիսին «Իջեւանի ՃՇՇ» ՓԲԸ-ն Տավուշի մարզի ընդհանուր իրավասության առաջին ատյանի դատարան հայց էր ներկայացրել «Իջեւանի ստուդիա» ՍՊԸ ընկերության եւ այդ հեռուստաընկերության լրագրող Նաիրա Խաչիկյանի դեմ` պահանջելով պարտավորացնել Նաիրա Խաչիկյանին եւ «Իջեւան ստուդիա» ընկերությանը հրապարակորեն ներողություն խնդրել եւ հօգուտ «Իջեւան ՃՇՇ» ընկերության Նաիրա Խաչիկյանից եւ «Իջեւան ստուդիա» ՍՊԸ-ից բռնագանձել 3 միլիոն դրամ` որպես փոխհատուցում, եւս 264 հազար դրամ՝ որպես դատական ծախս, որից 200 հազար դրամը` փաստաբանին վճարած վարձատրության գումար եւ 64 հազարը` որպես վճարված պետական տուրքի գումար: «Իջեւանի ՃՇՇ» ՓԲԸ հայցադիմումի մեջ նշված է, որ 2011թ. հունիսի 21-ին հայկական երկրորդ հեռուստաալիքի «Լրաբեր» լրատվական ծրագրով, ինչպես նաեւ «Երկիր Մեդիա» հեռուստաընկերությամբ մի քանի անգամ հեռարձակվել են տեսանյութեր, որոնց մեջ տեղ են գտել «Իջեւանի ՃՇՇ»-ի գործարար համբավը արատավորող կեղծ տեղեկություններ: Դատը սկսվել էր 2011 թվականի օգոստոսի 18-ին, Տավուշի մարզի առաջին ատյանի դատարանի Դիլիջանի նստավայրում: Կայացել է մի քանի նիստ, սպասվում էր, որ նոյեմբեր ամսին դատավոր Արշակ Շահոյանը կհրապարակի վճիռը: Սակայն անսպասելի կերպով գործը քննող դատավորը փոխվեց: Հունվարի 20-ին Իջեւան քաղաքում Տավուշի մարզի առաջին ատյանի դատավոր Արման Կուրեխյանը փաստացի «նոր տողից» սկսեց դատը: «Իջեւանի ՃՇՇ» ՓԲԸ-ի շահերի պաշտպանությամբ հանդես է գալիս փաստաբան Նաիրա Խաչատրյանը: Դատարանում Նաիրա Խաչիկյանի շահերը շարունակում է ներկայացրել փաստաբան Գարիկ Գալիկյանը, Նաիրա Խաչիկյանը նախկինի նման դատին ներկա չի չի եղել: «Իջեւան ստուդիան» դատարանում ներկայացուցիչ, փաստաբան չունի : Դատավորը կողմերին առաջարկել է համաձայնություն գալ, սակայն այն չի կայացել: Այս գործով դատական հաջորդ նիստը նախատեսված է փետրվարի 3-ին:
Ոսկան Սարգսյան
