Բրիտանական հանրահայտ Deep Purple ռոք խումբն իր կայքում հայտարարել է, որ նոր ալբոմ է ձայնագրում: Ձայնագրությունը, որի մասին ոչ մի մանրամասն չի հայտնվում, կդառնա խմբի ստուդիական ձայնասկավառակների ցանկում 19-րդը: Deep Purple 2005 թվականից այս կողմ նոր ալբոմ չի հրատարակել: Այդ ժամանակ հրատարակվել էր Rapture of the Deep ալբոմը:
Նոր նյութի ձայնագրությունը կձգվի մինչեւ այս տարվա ամառը: Մինչեւ ալբոմի վրա աշխատանքները չավարտվեն` խումբը ոչ մի համերգ չի տա: Խմբի վոկալիստ Յան Գիլլանը հայտարարել է, որ հասկանում է Deep Purple-ի երկրպագուների հիասթափությունը, սակայն խոստացավ, որ աշնանը իրենց կոլեկտիվը կսկսի մի նոր շրջագահությունը, որը հաջորդ տարի կվերաճի միջազգային շրջագայության` նվիրված նոր ալբոմին:
Հիշեցնենք, որ Deep Purple-ը ստեղծվել է 1968-ին: Այժմ խմբի կազմում բացի Գիլանից, մտնում են նաեւ կիթառիստ Սթիվ Մորսը, ստեղնային գործիքահար Դոն Էյրին, բաս կիթառահար Ռոջեր Գլովերը եւ հարվածային գործիքներ նվագող Յան Փեյսը:
