Սա «Կանաչների միություն» հ/կ նախագահ Արմենակ Դովլաթյանի կոչն է, որին արձագանքել են Ստեփանավանի «Էկո Լոռի» եւ «Օրհուս» հասարակական կազմակերպությունները: Ստեփանավանում Ձորագետի հետազոտության արդյունքում հաստատվել է, որ հայտարարությունը համապատասխանում է իրականությանը՝ Ձորագետը սակավաջուր է, որը խիստ աղտոտված է, ձկնորսներն էլ բողոքում են, թե այլեւս ձուկ չկա գետում: Բնապահպանները ահազանգում են՝ պատճառը Արմանիսի ոսկու բազմամետաղանոց հանքն է, որի թափոնները աղտոտում են Ձորագետը:
Ստեփանավանի բնապահպանական կազմակերպությունների համար Արմանիսի հանքավայրը փակ տարածք է: «Էկո Լոռի» հ/կ ղեկավար Մանյա Մելիքջանյանին հաջողվել է հեռախոսային խոսակցություն ունենալ Արմանիսի ոսկու բազմամետաղային հանքավայրի ադմինիստրացիայի ներկայացուցիչ տիկին Նաիրայի հետ, որը պարզաբանել է. «Արտադրական օգտագործված ջուրը գիշեր-ցերեկ ստուգվում է լաբորատորիայում, ապա բաց թողնվում գետ»: Մանյա Մելիքջանյանը նկատում է, որ կարծիքները հակասում են՝ «Սագամար» ՓԲԸ-ի գործադիր տնօրեն Վ. Պապյանը «Ստեփանավան» թերթի հարցազրույցում հայտնել է. «Մենք ընտրել ենք պոչերի ֆիլտրացիայի եւ հանքավայր վերադարձնելու եղանակը»:
Ստեփանավանի բնապահպանական կազմակերպություններին 2 տարվա ընթացքում չի հաջողվել մտնել հանքավայր եւ պարզել՝ ինչ տարբերակով են աշխատում: Նրանք աջակցություն են խնդրում բոլոր բնապահպանական կազմակերպություններից:
ՆԵԼԼԻ ԴԱՎԹՅԱՆ
Կարդացեք նաև
«Առավոտ» օրաթերթ
