Ֆելիքս Բաշոյանը ասում է, որ Լիդա Նանյանի թեկնածությունը չի էլ քննարկվել
Տևական ժամանակ է` Գյումրիում լուրեր էին շրջանառվում, որ կադաստրի Գյումրու նորաբաց գրասենյակի պետ նշանակելու են Շիրակի նախկին մարզպետ Լիդա Նանյանին: Այս խոսակցություններն ինչ-որ տեղ պայմանավորված էին նրանով, որ փոխվարչապետ Արմեն Գևորգյանը մարզպետ տիկնոջը թոշակի ճանապարհելիս` խոստացել էր, որ անգործ չեն թողնի նրան, ուժերը կօգտագործեն ինչ-որ համակարգում:
Այսօր կադաստրի պետական կոմիտեի նախագահի տեղակալ Ֆելիքս Բաշոյանը Aravot.am-ին տեղեկացրեց, որ մի քանի ժամ առաջ Գյումրու գրասենյակի պետի պաշտոնը հանձնվել է համակարգի երկարամյա աշխատողներից մեկին` Սոս Մինասյանին: «Դրանք միայն լուրեր են, ավելի շուտ կասեի ասեկոսեներ են, որովհետև լուրը ինչ-որ իմաստ ունի, իսկ ասեկոսը իմաստազուրկ է ընդհանրապես: Շիրակի նախկին մարզպետի թեկնածությունը ընդհանրապես չի քննարկվել կոմիտեում, դա բացառվում է, հնարավոր չէ.այսօր նշանակում արդեն եղել է, մենք պաշտոնյա ենք ընտրել համակարգից»,-ասաց պարոն Բաշոյանը:
Կադաստրում կատարված նոր փոփոխությունների, ինչպես նաև վերջերս առաջացած հերթագոյացումների մասին Ֆելիքս Բաշոյանի պարզաբանումները ընթերցեք «Առավոտ»-ի առաջիկա համարներում:
Նունե ԱՐԵՎՇԱՏՅԱՆ
