Այսօր աշխատանքային օրվա ավարտին՝ ժամը 17.55-ին, Կենտրոն եւ Նորք-Մարաշ վարչական տարածքի ընդհանուր իրավասության դատարանի դատավոր Մնացական Մարտիրոսյանը հրապարակեց ազգային անվտանգության ծառայության հակահետախուզության գլխավոր վարչության 4-րդ բաժնի պետի տեղակալ Արմեն Տեր-Մինասյանի դատավճիռը: Նա դատապարտվեց 7 տարվա ազատազրկման՝ կաշառք վերցնելու դիմաց ոչ իրավաչափ գործողություններ կատարելու համար:
Մինչ դատավճռի հրապարակումը, Արմեն Տեր-Մինասյանը հանդես եկավ վերջին խոսքով եւ ասաց, որ չի արել այն, ինչ վերագրվել է իրեն: Նա հորդորեց դատարանին՝ պաշտպանի ճառում «կարմիրով նշվածները չանտեսել»: ԱԱԾ աշխատակցի պաշտպանն էր ՀՀ փաստաբանական պալատի նախագահ Ռուբեն Սահակյանը, իսկ մեղադրանքը պաշտպանում էր ՀՀ գլխավոր դատախազությունից Կորյուն Փիլոյանը:
Մինչ դատավճռի հրապարակումը, դիմեցինք դատական այս գործընթացին հետեւող փաստաբաններից մեկին՝ Լուսինե Սահակյանին, թե ինչպիսի կանխատեսումներ ունի: Նրա կանխատեսումը հետեւյալն էր. «Եթե Հայաստանի Հանրապետությունում ենք՝ դատապարտվելու է»:
Ի դեպ, նկատենք, որ այս նույն դատարանի կողմից 7 տարվա ազատազրկման էր դատապարտվել նաեւ ազգային անվտանգության ծառայության մեկ այլ աշխատակից՝ քննիչ Վլադիմիր Կոթոլյանը, դարձյալ 7 տարվա ազատազրկման, դարձյալ կաշառքի գործով: Ուշադրության արժանի է այն, որ երկուսի դեպքում էլ իրեղեն ապացույցների մեջ չկա նշված կաշառքը:
Կարդացեք նաև
Դատավճռի հրապարակման պահին ներկա չէին ոչ մեղադրողը, ոչ ամբաստանյալի պաշտպանը:
Ռուզան ՄԻՆԱՍՅԱՆ
