«Պետք է ազատվենք այն վիճակներից, երբ ցանկացած փաստաբան իր պարտքն է համարում պարտված գործից հետո հավաքել լրագրողներին ու հիմնավորել իր՝ չակերտավոր պնդումները, թե տեսեք, ինչ անարդար դատական իշխանություն ունենք: Մյուս կողմից էլ՝ պետք է հստակ ու պարզ լինի , որ ցանկացած դատավոր, որը կոպիտ խախտում է կատարել, պետք է պատասխանատվության ենթարկվի, որ ես կարող եմ գնալ վերադաս ատյան ու բեկանել էդ ակտը: Մեր օրենքն այս առումներով խնդիր ունի»,-այսօր ԱԺ -ում ՀՀ իրավական ու դատական բարեփոխումների 2012-16թթ. ծրագրի լսումների ժամանակ ասաց արդարադատության նախարար Հրայր Թովմասյանը:
Նրա խոսքերով, խնդիրներ կան ոչ միայն դատավորի ներքին անկախության ապահովման, այլեւ կադրերի ընտրության, վերապատրաստման հարցերում. «Պետք է ապահովենք դատարանի վստահության աճ, եթե այսօր դատարանի նկատմամբ կա ընդամենը 15-20 տոկոս վստահություն, այն պետք է հասցնել 70-80-ի»:
ԱԺ պետական- իրավական հարցերի մշտական հանձնաժողովի նախագահ Դավիթ Հարությունյանն էլ հավելեց, որ Հայաստանի մի շարք օրենսգրքեր հեռու են կատարելությունից. «Բայց մենք խնդիրը չպետք է դնենք նորը ընդունելու կամ հինը պահպանելու, պետք է ֆիքսենք խնդիրները: Պետք է պահպանենք այն, ինչ հնարավոր է եւ փոխել, ինչ անհրաժեշտ է:Սա ասում եմ, որպես պահպանողական կուսակցության ներկայացուցիչ»:
Նրա գնահատմամբ, իրավական ու դատական բարեփոխումների 2012-16թթ. ծրագիրը ռազմավարական փաստաթուղթ է, ու որոշ դեպքերում՝ ծայրահեղ դետալիզացիայի են ենթարկել ու առաջարկել լուծումներ. «Կարեւոր է ճիշտ ձեւակերպել ռազմավարական խնդիրը, ի՞նչ խնդիր է ծագել ու նշել պատճառը; Խնդրի լուծման հնարավոր եղանակներն այլեւս այս փաստաթղթի խնդիրը չեն»:
Կարդացեք նաև
Արփինե ՍԻՄՈՆՅԱՆ
