Քիչ առաջ Կենտրոն եւ Նորք-Մարաշ վարչական տարածքի ընդհանուր իրավասության դատարանը հետաձգեց Ախալքալաքի բնակիչ Սպարտակ Ակոջյանի նկատմամբ հարուցված քրեական գործով դատական նիստը: Դատարան չէր ներկայացել նրա փաստաբանը՝ Էդուարդ Չինարյանը, տեղեկացնելով, որ հարազատի հուղարկավորման պատճառով չի կարող ներկա գտնվել:
Սպարտակ Ակոջյանը Թբիլիսիում գտնվող Ադրբեջանի դեսպանատան տարածքից ձեռք է բերել «Արմյանսկի տեռորիզմ» ռուսերեն 10 հատ գիրք, որից 7 գիրք ապրիլին Վրաստանով տեղափոխել է Հայաստան: Նա ապրիլի 23-ին Վերնիսաժի տոնավաճառում փորձել է վաճառել դրանք: Այս գրքում ղարաբաղցիների ազատագրական պայքարը ներկայացվել է «խաղաղ ազերիների» դեմ հայ «հանցավոր խմբավորումների» կողմից ահաբեկչություն: Քրեական գործում Ակոջյանի գործողությունները դիտվել են հայ ժողովրդի արժանապատվությունը նվաստացնելուն ուղղված հրապարակային գործողություններ:
Սպարտակ Ակոջյանը ներկայումս գտնվում է արդարադատության նախարարության «Երեւան- կենտրոն» ՔԿՀ-ում: Մեղադրանքը պաշտպանում է ՀՀ գլխավոր դատախազության ազգային անվտանգության մարմիններում քննվող գործերով վերահսկող վարչության ավագ դատախազ Արամ Ամիրզադյանը:
Ռուզան ՄԻՆԱՍՅԱՆ
Կարդացեք նաև
