«Ժառանգության» եւ Դաշնակցության՝ ի պաշտպանություն 100 տոկոսանոց համամասնական ընտրակարգի կազմակերպած համաժողովում, ՀՅԴ ներկայացուցիչ Արծվիկ Մինասյանը համառոտ տեղեկանք ներկայացրեց այն մասին, թե ի՞նչ արդյունավետությամբ են աշխատել ԱԺ պատգամավորները: Ըստ այդմ, մեծամասնական ընտրակարգով ընտրված 41 պատգամավորներից 29-ը՝ 71 տոկոսը, հինգ տարվա ընթացքում «ոչ մի ծպտուն» չեն հանել Ազգային Ժողովում: 1-2 ծպտուն են հանել հինգ պատգամավոր, 7-ը ակտիվ են եղել: Համամասնական ընտրակարգով ընտրված 90 պատգամավորներից 51-ն են ակտիվ եղել՝ վերջին գումարման Ազգային Ժողովում:
Համաժողովում իրենց ելույթներում, այսպես ասած՝ «ուրվականների» խնդրին անդրադարձան «Ժառանգության» փոխնախագահ Ռուբիկ Հակոբյանը եւ ՀԱԿ համակարգող Լեւոն Զուրաբյանը: «Ուրվական» ձեւակերպումը Լեւոն Զուրաբյանին է պատկանում, ինչն առաջ բերեց դահլիճի զվարճանքը:
Ռ. Հակոբյանն էլ զարմացավ՝ թե ինչպես՞ են այդ մարդիկ մեկ օրում հասցնում ամերիկաներից ու էլ չգիտեմ որտեղերից հասցնում գալ, քվեարկել ու անհետանալ: Ըստ Հակոբյանի, այդ թիվը 600-800 հազար մարդ է, ըստ Լեւոն Զուրաբյանի՝ 500 հազար մարդ:
ՀԱԿ համակարգողը խոստացավ բոլոր հնարավորություններով կանգնել այն ուժերի կողքին, որոնք մտադիր են հասնել համամասնական 100 տոկոսանոց ընտրակարգի հաջողությանը:
Կարդացեք նաև
Փետրվարի 17-ին, այդ նպատակով, ՀԱԿ-ը կանցկացնի առաջին հանրահավաքը: Ակտիվ հանրահավաքներ կլինեն նաեւ այն օրերին, երբ ԱԺ-ում քննարկվի «Ժառանգության» եւ Դաշնակցության նախաձեռնությունը:
Նելլի ԳՐԻԳՈՐՅԱՆ
