«Ես այս օրերին ընթերցեցի իմ ընկերների շատ ոգեւորված մեկնաբանությունները, որ ԵԽԽՎ-ն դեմ է համամասնական ընտրակարգին: Ինձ զվարճացրեց այս տեսակետը»,- «Ժառանգության» եւ Դաշնակցության կազմակերպած համաժողովում այսօր հայտարարեց ԲՀԿ պատգամավոր Նաիրա Զոհրաբյանը:
Տիկին Զոհրաբյանին զվարճացրել է նաեւ ԵԽԽՎ համազեկուցողի պահվածքը՝ «ձեռքը կամ չգիտեմ ինչը սեղանին խփելը»: Նա հայտարարեց, որ պատասխանատվություն ունեցող ցանկացած գործիչ, քաղաքական ուժ, չպետք է թույլ տա, որ գան եւ մեզ թելադրեն, թե մեր քաղաքական դաշտը, հասարակությունն ինչ ընտրակարգով անցկացնի իր ընտրությունները: Նրա կարծիքով եվրոպացի չինովնիկների դերն այս ամենում՝ «լինել չեզոք դիտորդ»: Մոտ օրերս Նաիրա Զոհրաբյանը մեկնելու է Բրյուսել եւ Ստրասբուրգ, որտեղ հնչեցնելու է իր պահանջը:
Հիշեցնենք, որ հունվարի 16-ին ԵԽԽՎ հայաստանյան պատվիրակության հետ հանդիպման ժամանակ, ԵԽԽՎ հայաստանյան համազեկուցող Ջոն Պրեսկոտը, ըստ մեր պատվիրակության անդամ, ՀՅԴ ԳՄ ներկայացուցիչ Արմեն Ռուստամյանի, զայրացել եւ ձեռքը սեղանին է խփել, երբ պատվիրակությունը փորձել է կարեւորել ԱԺ ընտրությունները 100 տոկոս համամասնական ընտրակարգով անցկացնելու անհրաժեշտությունը:
Նելլի ԳՐԻԳՈՐՅԱՆ
