2001-2003 թվականներին Լինսի հիմնադրամի միջոցներով կառուցվեց Տավուշի մարզի մի հատվածում սահմանագոտին շրջանցող, Ոսկեպար-Կիրանց 11 կմ երկարությամբ ճանապարհը: Ճանապարհը կառուցել է «Դորոժնիկ» ՍՊԸ-ն: Շինարարության համար, մեր տվյալով, ծախսվել է մոտ 7 միլիոն դոլար: Ներկայումս այս ճանապարհում, շուրջ 20 տեղ ասֆալտի ծածկույթը քանդվել կամ փոս է ընկել, ճանապարհը դարձել է անբարեկարգ: Պատճառը, ըստ մասնագետների, ամենայն հավանականությամբ, ասֆալտի ծածկույթի ամուր չլինելն է կամ հիմքի թույլ լինելը, մեծ հաշվով՝ անորակ աշխատանքը:
Մինչեւ Այրումի մատույցներում անցած տարվա ահավոր սողանքը, Հայաստան բեռներ ներկրող խոշոր բեռնատարները Երեւան էին հասնում Բագրատաշեն-Վանաձոր ճանապարհով, սողանքից հետո դրանք երթեւեկում են Բագրատաշեն-Նոյեմբերյան-Իջեւան ճանապարհով: Այս ճանապարհի մաս կազմող Ոսկեպար-Կիրանց հատվածի ասֆալտի բարակ շերտը չի դիմանում ծանրաքարշ մեքենաների ճնշմանը: Սույն ճանապարհի շահագործումն իրականացնող Նոյեմբերյանի «Լեւոն երկրորդ» ՍՊԸ տնօրինությունը ճանապարհին ստեղծված մտահոգիչ վիճակի վերաբերյալ նամակ է ուղարկել տրանսպորտի եւ կապի նախարարությանը:
Ոսկան ՍԱՐԳՍՅԱՆ
