Ֆուտբոլի աշխարհի 2014 թվականի առաջնության ժամանակ բոլոր 12 մարզադաշտերում կթույլատրվի գարեջրի ազատ վաճառք: Այս մասին լրատվամիջոցներին հայտարարել է ՖԻՖԱ-ի գլխավոր քարտուղար Ժերոմ Վալկեն: «Գարեջուրն աշխարհի առաջնությունների բաղկացուցիչ մասերից է եւ մենք այն արգելել, անգամ` այդ թեման քննարկել չենք պատրաստվում: Մենք գարեջուր վաճառելու լրիվ իրավունք ունենք, առավել եւս, որ մեր գլխավոր գործընկերն այդ ոլորտում խոշոր հոլդինգի բրազիլական դուստր ձեռնարկություն է», – ասել է պաշտոնյան:
Իսկ ահա Բրազիլիայի առողջապահության նախարարը հակառակ համոզման է: Նա մտադիր է ճնշում գործադրել խորհրդարանի վրա, որպեսզի աշխարհի առաջնության ողջ ընթացքում արգելք դրվի մարզադաշտերում գարեջուր վաճառելու վրա:
Հիշեցնենք, որ Բրազիլիայում 2003 թվականից, բոլոր մարզադաշտերում արգելված է ցանկացած տեսակի ալկոհոլային խմիչքի թե վաճառքը, թե խմելը:
Աշոտ ՀԱԿՈԲՅԱՆ
