Aravot.am-ի հարցին` իր պատկերացմամբ, ո՞րն է լինելու ՄԻՊ-ի դերն առաջիկա ընտրական գործընթացներում եւ արդյոք նման դեր պաշտպանն ընդհանրապես մտադի՞ր է ստանձնել, ՀՀ Մարդու իրավունքների պաշտպան Կարեն Անդրեասյանն արձագանքեց` ասելով, իրենք ընտրական գործընթացների ժամանակ, անշուշտ, իրենց դերն ունենալու են ու փորձելու են հնարավոր միջոցներով իրավական աջակցություն ցուցաբերել բոլոր քաղաքացիներին, վստահված բոլոր անձանց, ցանկացած քաղաքական ուժի, եթե խախտվեն նրանց քաղաքացիական եւ քաղաքական իրավունքները. «Ընտրական իրավունք ասելով, ես նկատի ունեմ ոչ միայն ընտրացուցակների հետ կապված խնդիրները, այլեւ` քարոզարշավի ընթացքում հնարավոր իրավախախտումների, ազատ տեղաշարժի, ազատ արտահայտվելու եւ այսօրինակ այլ խախտումները, որոնք կարող են առնչվել ընտրական գործընթացին, եւ որոնք լինելու են մեր ուշադրության կենտրոնում: Մարդիկ, անշուշտ, ակնկալելու են նաեւ ընտրական ողջ գործընթացների եւ ընդհանրապես 2012 թվականի քաղաքական եւ քաղաքացիական իրավունքների պաշտպանության վիճակի մասին որոշակի գնահատականներ ՄԻՊ-ից, եւ այս ծրագիրը, որի մանրամասները շուտով կբացահայտենք, մեզ հնարավորություն կտա ավելի հիմնավոր փաստեր եւ տեղեկատվություն` համարժեք եւ օբյեկտիվ գնահատականներ տալու համար»:
Անդրադառնալով մեր հարցին` ՄԻՊ-ը մտադի՞ր է արդյոք ընտրական ողջ գործընթացը դիտարկել ու նման գործառույթ ունի՞ արդյոք, Պաշտպանն ասաց, որ եթե ամեն ինչ բարեհաջող ընթանա եւ ստորագրվի ԵՄ-ի եւ ԵԱՀԿ-ի ու ՄԻՊ գրասենյակի կողմից համատեղ քննարկվող ծրագրի շուրջ համաձայնագիրը, ապա այո, որովհետեւ այդ ծրագրի իրականացումը ներառելու է նաեւ դիտորդական որոշակի տարրեր: «Խոսքը որպես դիտորդներ հանդես գալու մասին չէ, այլ այն աշխատանքի, որի արդյունքում մենք կուտակելու ենք այնպիսի տեղեկատվություն, որը կդառնա ՄԻՊ-ի հայտարարությունների եւ գնահատականների հիմքը»,-պարզաբանեց ՄԻՊ Կարեն Անդրեասյանը:
