Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր ընթացավ Ճանապարհային ոստիկանության նախկին պետ Մարգար Օհանյանի, գումարտակի հրամանատար Ստեփան Կարախանյանի , Արա Լեւոնյանի եւ Սամվել Մախմուրյանի դեմ հարուցված քրեական գործի դատաքննությունը:
Մ. Օհանյանը դատաքննությունից հետո՝ մինչ կտարվեր արդարադատության նախարարության «Վարդաշեն» քրեակատարողական հիմնարկ, լրագրողներին բարձրաձայնեց, որ լավ է, առողջությունը նորմալ եւ ասաց. «Սպասեք ցուցմունքիս, այն ժամանակ էլ հայտարություն կլինի»:
Այսօր դատարանը լսեց վկաներ՝ այն ժամանակ ՃՈ 1-ին սպայական գումարտակի հրամանատար Արսեն Մարդոյանին, վաշտի հրամանատար Վարդան Նարգիզյանին, 2-դ գումարտակի 2-րդ վաշտի հրամանատար Արամ Գալստյանին եւ ճանապարհային ոստիկանության տնտեսական բաժանմունքի ավագ տեսուչ Եփրեմ Ստեփանյանին:
Վկաներն, ըստ էության, տեղեկացրին աշխատանքի կազմակերպման նպատակով Ստեփան Կարախանյանից ստացած վառելիքի մասին:
Կարդացեք նաև
Վկա Վարդան Նարգիզյանն ասաց, որ յուրաքանչյուր ամիս ստացել է բենզին եւ սպասարկել են Վանաձորի, Սպիտակի, Տաշիրի, Ալավերդիի տարածքները:
4,5 հազար լիտրի փոխարեն, ըստ վկայի, իրենք հաշվետվություն են ներկայացրել 12 կամ 14 000 լիտրի:
Մեղադրող Հարություն Հարությույանի հարցին, թե «Փորձե՞լ եք ճշտել, թե ինչու էր պակաս տրվում»,-վկան պատասխանեց, թե Կարախանյանն ասել էր, կստանանք՝ կտանք:
Հաջորդ հարցին՝ թե «Կարախանյանի հետ զրույցի ժամանակ շոշափվե՞լ է Օհանյանի անունը»՝ բացասական պատասխան տրվեց:
Վկա Արամ Գալստյանն էլ հայտնեց, որ 52 աշխատողով եւ 21 ավտոմեքենայով սպասարկել է Վայոց ձորի տարածքը: Յուրաքանչյուր ամիս ստացել են 4100 լիտր , բայց ցույց են տվել 1,7 տոննա: Նա ասաց, որ բենզինի քանակը ավելի է ցույց տվել Ստեփան Կարախանյանի հանձնարարությամբ: Ըստ նրա, Ստեփան Կարախանյանի հետ ունեցել է խոսակցություն, ծախսը ավելի էին ցույց տալիս, որպեսզի անվադողով փոխեին: Իսկ երբ մեղադրողը հարցրեց. «Այդ մասին տեղեկացրե՞լ եք ՃՈ պետին» , ճանապարհային ոստիկանը պատասխանեց. «Պետին չեմ զեկուցել, սխալ եմ արել»:
Ի դեպ, այս վկան առաջին անգամ ցուցմունք էր տվել հատուկ քննչական ծառայությանը 2011թ. սեպտեմբերի 13-ին: Նա թվեր էր հիշել՝ կապված 2009- 2010 թվականների հետ: Սակայն դատարանում չէր հիշում, երբ իր տված ցուցմունքից անցել էր 3-4 ամիս: Խոսքը յուրաքանչյուր ամիս ստացված վառելանյութի քանակի մասին էր: Նա ասաց, թե 4500 լիտր են ստացել, ինչի պատճառով էլ հրապարակվեց նախաքննական ցուցմունքի այդ հատվածը. պարզվեց 4100 է ասել: «Հիշողությունով եմ ասում»,- արդարացավ վկան:
Նախորդ դատական նիստին էլ հարցաքննեցին 4 վկայի: Այսինքն, դատակոչվելիք 20 վկաներից 8-ի բացատրությունները լսվել են: Սակայն որեւէ մեկը դեռ չի հայտնել, թե այս ամենի հետ կապ ունի ճանապարհային ոստիկանության նախկին պետը:
Ռուզան ՄԻՆԱՍՅԱՆ
Տեսանյութը՝ «Հենարանի»
