Մարզխորհրդի նիստի ժամանակ մարզպետ Գիզիրյանը (կենտրոնում), դժգոհեց Տուֆաշենի գյուղապետից
Ինչպես տեղեկացրել ենք, մի շարք ապօրինություններ թույլ տալու ու աշխատել չսիրելու մեղադրանքով երեկ պաշտոնազրկել են Շիրակի մարզի գյուղապետերից մեկին` Արթիկի շրջանի Տուֆաշեն համայնքի 6 տարվա ղեկավար Համազասպ Մխիթարյանին:
Մարզպետարանի տարածքային վարչության աշխատակիցների բնութագրելով, գյուղապետը ոչ միայն տարին տասներկու ամիս տեղում չի եղել, այլև փաստացի փախուստի մեջ է գտնվել, այնքան պարտք ու տալիք է արել, որ պարտք տվողները եկել ու մարզպետարանցիների կոկորդն են բռնել: «Մեկ գյուղացիներն էին խմբովի մարզպետարան գալիս, մեկ ավագանու անդամները ու խնդրում էին` մի ճար գտեք, մեզ գյուղապետից փրկեք: Մենք էլ ստիպված ոչ օֆիցիալ հետախուզում էինք հայտարարում ու վերջինս բերման էինք ենթարկում:Բայց ինչքան կարելի է էդպես աշխատել:Մարդիկ բյուջե են ուզում հաստատել, գյուղապետը կորած է, չկա, գյուղապետարանում ձևի համար ոչ մի փաստաթուղթ չկա»,- Aravot.am-ի հետ զրույցում բողոքեց մարզպետարանի տարածքային վարչության պետ Կարլեն Աբրահամյանը:
Մենք այս պաշտոնյայից հետաքրքրվեցինք` հնարավո՞ր է Կարլեն Աբրահամյանը անձնական խնդիրներ ունի գյուղապետի հետ, որի պատճառով էլ նրան մարզպետ Գիզիրյանը պաշտոնանկ է արել: Նշենք, որ Կարլեն Աբրահամյանը Աշոտ Գիզիրյանի մոտ ընկերն է, և երկու օր առաջ Տուֆաշենի գյուղապետը 7or.am էլեկտրոնային կայքում իր անունից նամակ էր հրապարկել` մարզպետարանի վերոհիշյալ պաշտոնյանին մեղադրելով մարզպետի գործառույթը ձեռքից վերցնելու ու Արթիկը փաստացի կառավարելու մեջ:
Տուֆաշենի գյուղապետը, բնութագրելով մարզպետարանի տարածքային վարչության պետ Կարլեն Աբրահամյանի աշխատանքը, նշել էր, որ «հուսախաբություն, վիրավորանք, զայրույթ ու հակակրանք» է զգում: Ի դեպ, մեզ հետաքրքրող թեմայի շուրջ փորձեցինք պարզաբանումներ ստանալ հենց գյուղապետից, սակայն նա երեկվանից անհասանելի էր:
Կարդացեք նաև
Մարզպետարանի պաշտոնյաների ասելով, այսօր գյուղապետարանում փաստաթղթերի ընդունում-հանձնում պիտի կատարեին, սակայն նա առավոտից մարզպետարանի աշխատակիցներին նստեցրել է գյուղում, խաբել ու չի եկել: Կառլեն Աբրահամյանը, ի պատասխան մեր հարցի, վստահեցնում է, որ ինքը ոչ մի անձնական խնդիր չի ունեցել գյուղապետի հետ, միակ խնդիրը եղել է այն, որ 5-6 տարի շարունակ նրան չի կարողացել գտնել` աշխատեցնելու համար: «Արթիկն էլ ոչ մարզպետը, ոչ էլ ես եմ կառավարում, Արթիկը քաղաքապետ ունի»,- ասում է մարզպետարանի պաշտոնյան:
Ինչևէ, մենք տուֆաշենցիներից նույնպես փորձեցիքն ճշտել, թե ինչո՞ւ են բողոքավոր գյուղապետից: Ի դեպ, գյուղի մեծ մասը նրա բարեկամներն են, կոլխոզի ժամանակ նրա հայրն է եղել կոլխոզի նախագահը: Գյուղացիները դժգոհեցին, որ Համազասպ Մխիթարյանը գյուղի համար ոչինչ չի արել, եղածն էլ քոռուփուչ է արել, օրինակ ասենք` մի կիասաքանդ բուժարան կար, հիմնահատակ քանդել է տվել, գյուղապետարանի առաջին հարկում դպրոցի երեխաների համար ճաշարան են սարքել, ձրի հաց են բերում, ճաշարանը բիլիարդանոցի է վերածել, գյուղացիներից պարարտանյութերի փող է հավաքել ու ապրանքը չի տվել:
Տուֆաշեցիների դժգոհելով, իրենք նույնիսկ անասուններին ջուր տալու համար, հասնում են գյուղի ձորը, որտեղից էլ, բավականին վտանգավոր պայմաններում, ջուր են կրում: «Ջրամբարից ջուրը անիմաստ թափվում, ճանապարհները սառցակալվում են, բայց մենք խմելու ջուր չունենք: Շուրջբոլորի գյուղապետերը իրենց ճանապարհները սարքել տվեցին, բայց մեր վիճակն ինչ է, ավտոբուսը գյուղ է մտնում, միջի ուղևորները ցնցումներից քիչ է մնում ուշագնաց լինեն: Բա որ գյուղի կլուբը տեսնեք, պատուհանների փոխարեն ցելոֆոններ են քաշած, էլ չենք խոսում կաթկթոցների մասին, որի պատճառով գյուղի հարուստ գրադարանը ավերակ է դարձել: Գյուղը 4 հատ քարի հանք ունի, բայց գյուղացիներից ոչ մեկը հանքատեր չէ, գյուղի ջահելությունը էնտեղ ստրուկի պես աշխատում է:Մյուս գյուղերը ռեստորան ու հյուրանոց են սարքում, օրինակ կողքի Հայրենյացը, Պեմզաշեն էլ մտնում ես` գեղեցկությունից բարևդ ես մոռանում, իսկ մենք գյուղապետի երեսը չենք տեսնում, նա Արթիկում էր ապրում, զանգում ես` հավերժ անհասանելի է », -դժգոհեցին մեր զրուցակիցները: Ըստ նրանց, գյուղապետը 6 տարվա մեջ գյուղի համար մի լավ բան է արել, խաչքար է դրել, որի վրա սակայն իր անունն է գրել:
Գյուղացիների ասելով, գյուղապետը պարտք –տալիքի մեջ է, ձեռքից նույնիսկ ավտոմեքենան են առել, տուն ու տեղ ծախել է ու փախել է: Նշենք, որ Համազասպ Մխիթարյանով այժմ հետաքրքրված է ԱԱԾ-ն:
Նունե ԱՐԵՎՇԱՏՅԱՆ
