Անցած տարվա սեպտեմբերի 17-ին «Թարմացված, բայց սխալաշատ» հրապարակմամբ տեղեկացրել ենք, որ այլ մարզպետարանների նման, Տավուշի պաշտոնական կայքն էլ թարմացվեց, նորացվեց ժամանակակից տեսք ու լրացուցիչ հնարավորություններ ստացավ, սակայն կայքում բազմաթիվ են սխալ տեղեկությունները:
Մեր հրապարակումից հետո դրանք ուղղվել են, սակայն մասամբ:
Օրինակ՝ «ընդհանուր տեղեկություններ» բաժնում նշված է, որ մարզում գործում է տեղական 3 հեռուստաընկերություն: Մինչդեռ մարզպետարանում պետք է որ լավ իմանային. Տավուշում տեղական 2 հեռուստաընկերություն կա`«Տավուշ» եւ «Իջեւան ստուդիա»:
Նույն բաժնում, մարզի բնակչության թիվը մի տեղ նշված է 134 700, մի այլ տեղ`134 400 մարդ: Ո՞ւր են կորել 300 հոգին: Ազգային վիճակագրական ծառայության Տավուշի մարզային գործակալության պետ Աիդա Աչինյանից տեղեկացա, որ մարզի բնակչության մասին տվյալները, մարդահամարի արդյունքները պատրաստ կլինեն ապրիլին: Ըստ Աչինյանի` 2011թ. հունվարի 1-ի դրությամբ մարզի բնակչությունը կազմել է 134 600 մարդ:
Կարդացեք նաև
Մարզխորհրդի նիստերում Արմեն Ղուլարյանը համայնքների ղեկավարներին պարբերաբար հորդորում է կայքին տրամադրել իրենց համայնքներին վերաբերող ընդգրկուն, ճիշտ տվյալներ: Փաստորեն՝ չեն տրամադրում:
Ոսկան ՍԱՐԳՍՅԱՆ
