Սեւքարի դպրոց
Երեկ տեղեկացրել ենք, որ Տավուշի մարզի Սեւքար գյուղի նախկին գյուղսովետի շենքի երկրորդ հարկում երեխաներին սամբո ուսուցանող Դավիթ Գաբրիելյանը մերժել է ֆիզկուլտուրայի ուսուցիչ աշխատելու՝ դպրոցի տնօրեն Սամվել Ճաղարյանի առաջարկը ու դրանից հետո, ըստ մարզչի, դպրոցի տնօրենի ցուցումով, ուսուցիչները սկսել են սամբո մարզաձեւի եւ դրա խմբակի դեմ հակաքարոզչություն անել, ծնողներին համոզել, որ երեխաներին հանեն սամբոյի խմբակից, ասելով, որ այլապես տարեվերջին գնահատականների հարցով երեխաները խնդիրներ են ունենալու՝ :
Երեկ Սեւքարում դասադուլ էր: Այսօր էլ Սեւքարի դպրոցի մոտ 30 աշակերտ դասի չի գնացել`շարունակելով բողոքել դպրոցի տնօրեն Սամվել Ճաղարյանի գործելակերպի դեմ: Ըստ աշակերտների` Ճաղարյանը ժողովում հայտարարել է, որ սամբոն էրոտիկ մարզաձեւ է:
Աշակերտներն «Առավոտի» թղթակցին ասացին, որ 27 տարվա դպրոցի տնօրենը իրենց խորհուրդ է տվել սամբոյի փոխարեն ծանրամարտով զբաղվել (Սեւքարի դպրոցում ծանրամարտի խմբակ կա), քանի որ, տնօրենի համոզմամբ, ծանրամարտով հնարավոր է արագ հարստանալ: Որպես արագ հաջողության օրինակ, Սամվել Ճաղարյանը նշել է ծանրորդ Տիգրան Մարտիրոսյանին:
Սահմանամերձ Սեւքարում եւ գյուղի դպրոցում լարված իրավիճակը շարունակվում է: Հունվարի 18-ին Սեւքարի դպրոցում եւ գյուղում առկա վիճակը մարզպետ Արմեն Ղուլարյանը քննարկել է Սեւքարի գյուղապետ Վլադիմիր Մարգարյանի հետ: Մանրամասներ հայտնի չեն:
Կարդացեք նաև
Ոսկան ՍԱՐԳՍՅԱՆ
