ՀՀ սփյուռքի նախարարության այս տարվա բյուջեն մոտ 490 միլիոն դրամ է եւ դրանով նախարարությունը շարունակելու է իրականացնել ինչպես հին ծրագրերը, այնպես էլ նորերն է նախաձեռնելու: Այսօր լրագրողների հետ հանդիպման ժամանակ ՀՀ սփյուռքի նախարար Հրանուշ Հակոբյանն ասաց, որ կշարունակվեն «Արի տուն», «Մեր մեծերը» ծրագրերը, մասնագիտական հետազոտությունները, համահայկական հավաքները:
2011 թվականին նախարարությունը կազմակերպել է 13 մասնագիտական համաժողով՝ «Հայ կնոջ դերը սփյուռքում», հայ սրտաբանների, լրագրողների, շինարարների եւ ճարտարապետների, սփյուռքի կազմակերպությունների ղեկավարների, գործարարների եւ առեւտրաարդյունաբերական պալատների ներկայացուցիչների եւ այլն: Այս ամենին մասնակցել են ավելի քան 150 երկրի հարյուրավոր ներկայացուցիչներ: Իսկ «Արի տուն» ծրագրով Հայաստան է եկել 812 սփյուռքահայ պատանի եւ աղջիկ՝ 35 երկրից: Անցած տարի 30 մեկօրյա դպրոց է բացվել Վրաստանում, Գերմանիայում, այլ երկրներում:
Դրսի հայ երիտասարդներին Հայաստանին մոտեցնելու համար էլ ստեղծվել են թե «Արի տուն» ծրագիրը, թե սփյուռքի երիտասարդ առաջնորդների դպրոցը, թե համահայկական երիտասարդական վիրտուալ խորհրդարանը: Նախարարությունը մտադիր է այս ամռանը կազմակերպել հայերենի դասընթացներ սփյուռքի երիտասարդների համար: Նախարարն ասաց, որ սահմանափակում, սակայն, չկա, եթե 40 տարեկան սփյուռքահայը ցանկություն հայտնի մասնակցել դասընթացին՝ խնդիր չի լինի: Բայց եթե մինչեւ 20-22 տարեկանների համար հայոց լեզվի դասընթացներին մասնակցությունը նման կլինի «Արի տուն» ծրագրին՝ Հայաստան կգան իրենց հաշվին, այստեղ կսովորեն պետության հաշվին եւ կապրեն հյուրընկալ ընտանիքներում, ապա մեծահասակների համար ուսուցումն էլի կլինի անվճար, իսկ կացարանի հարցը այլ լուծում կստանա:
Հրանուշ Հակոբյանը հայ բարերարներին կոչ արեց աջակցել հայապահպանության հարցում գլխավոր ու առանցքային դեր ունեցող գործոնի՝ լեզվի իմացությանն ուղղված հարցի լուծմանը:
Կարդացեք նաև
Բացի սրանից, Հայաստանը կփորձի իրականացնել «Համայնքը համայնքին» շարժումը. մի երկրի բարվոք հայ համայնքը կամ ֆինանսապես ապահով հայը օգնի այլ երկրի հայկական կառույցի:
Արամ ԶԱՔԱՐՅԱՆ
