Պայմանագրային զինծառայող Արտակ Նազարյանի մահվան գործով այսօր ժ.12-ին նշանակված դատական նիստը նախագահող Սամվել Մարդանյանը հետաձգեց:
Որպես պատճառ նշվեց արտագնա նիստերի ժամանակ հասարակական կարգի պահպանության անհնարինությունը, նաեւ երեկվա անկարգությունները: Դատական հաջորդ նիստը նշանակվեց հունվարի 24-ին ժ. 14-ին՝ Տավուշի մարզի ընդհանուր իրավասության դատարանի Իջեւանի նստավայրում: Տուժողի իրավահաջորդի ներկայացուցչի՝ Ռուբեն Մարտիրոսյանի «Ներողություն, մենք հայտարարություն ունենք»-ը դատավորը չլսեց եւ հեռացավ:
Նիստերի դահլիճից չէին հեռանում ամբաստանյալների հարազատները, որոնց կարծիքով կատարվածը խուլիգանություն է.«Մայրաքաղաքից հեռացնում են, որպեսզի մարդիկ չտեսնեն ինչ է կատարվում»: «Մարդակերներ, հանցագործներ»,- բղավում էին նրանք:
«Ինչ են ուզում իմ տղայից»,- հարցնում էր ամբաստանյալ Ադիբեկ Հայրապետյանի մայրը՝ Ջավահիր Հովհաննիսյանը. «Մեր երեխաներին զենքի նման պահում են այստեղ, ինչ են ուզում՝ չգիտենք: Ի՞նչ է արել Ադիբեկը: Տղայիս 1 տարի 7 ամիս է, նստացրել են, էլի բանակին զինվոր եմ տվել, 17 օր է, ծառայում է: Այս դատական գործը շինծու գործ է: Մայր եմ՝ կդիմանա՞մ:Ամեն օր վախը սրտիս մեջ է»: Ադիբեկի մայրն ասաց, որ ամբաստանյալներին բոլորին ծեծել են եւ ծեծով ցուցմունքներ կորզել:
Կարդացեք նաև
Ի դեպ, Հարութիկ Կիրակոսյանի հայրը «Aravot.am»-ին ասաց, որ երբ անցյալ տարի գնացել են Գայի (նախկին Խաթունախ) գյուղ, վկա Արման Մնացականյանի հայրն ասել էր, որ այնքան են իր որդուն ծեծել, որ արյուն էր միզում:
Դատական կարգադրիչներն ազատեցին դատարանը հարազատներից, կանխելով հնարավոր բախումները:
Ամբաստանյալների հարազատները Արտակ Նազարյանի հարազատների հետ բողոքի ցույց կազմակերպեցին ՀՀ նախագահի նստավայրի մոտ:
Ռուզան ՄԻՆԱՍՅԱՆ
