Փաստաբանների պալատի խորհուրդը, ՓՊ նախագահ Ռուբեն Սահակյանի նախագահությամբ, հունվարի 9-ին կարճեց փաստաբան Արթուր Գրիգորյանի դեմ հարուցված կարգապահական վարույթը՝ պատճառաբանությամբ, որ գործերի (որոնց հիման վրա վարույթ էր հարուցվել) վաղեմության ժամկետներն անցած էին։ Այսինքն՝ կատարվել էին վեց ամիս առաջ։ Սակայն, մեր տեղեկություններով, վարույթը կարճելուց հետո ՓՊ-ն երկու նոր դիմում է ստացել կրկին Արթուր Գրիգորյանի հետ կապված, եւ այդ գործերի վաղեմության ժամկետների հետ կարծես թե խնդիր չկա։ Կարգապահական հանձնաժողովում այդ դիմումների հիման վրա նոր վարույթ է հարուցվել «Հրապարակին» դատի տված փաստաբանի դեմ։ Դիմումներից մեկը վերաբերում է մեր թերթում հանդես եկած, Արթուր Գրիգորյանի մատուցած ծառայություններից դժգոհ քաղաքացի Ալեքսանդր Վարդանյանի գործին։ Վերջինս Գրիգորյանի հետ պայմանագիր ունի կնքած, եւ նա մինչ այս պահը համարվում է Վարդանյանի փաստաբանը։ Մենք տեղեկացանք նաեւ, որ կրկին ՓՊ-ին է պատրաստվում դիմել ՀՀ նախկին վարչապետ Հրանտ Բագրատյանի ներկայացուցիչը, որը վիճարկում է ՓՊ կարճման որոշումը եւ ներկայացնում նոր փաստեր՝ այս անգամ ժամկետի մեջ գտնվող գործով։
«Հրապարակ»
