Պայմանագրային զինծառայող, սպա Արտակ Նազարյանի մահվան գործով Տավուշի մարզի ընդհանուր իրավասության դատարանի արտագնա նիստը, ինչպես արդեն հաղորդել ենք, ընդհատվեց դատական նիստերի դահլիճում սկիզբ առած անկարգությունների պատճառով:
Դատարան էր բերվել վկա Արման Մնացականյանը, ում հարցաքննում էր ամբաստանյալ զինծառայողներ Մխիթար Մխիթարյանի, Հարութիկ Կիրակոսյանի, Ադիբեկ Հովհաննիսյանի պաշտպան Ալվարդ Մնացականյանը:
Պաշտպանը հարցրեց, թե գիտի՞ ինչ է բռնությունը, իսկ դատավոր Սամվել Մարդանյանը վկային հորդորեց՝ «Ասա, քո բառերով»: Վկան ասաց, որ բռնությունը մարդ ծեծելն է: Երբ պաշտպանը հարցրեց, թե արդյոք իր պաշտպանյալը՝ Հարութիկ Կիրակոսյանը Արտակ Նազարյանի նկատմամբ բռնությո՞ւն է կիրառել, վկան ասաց. «Չեմ կարողանում հարցերին պատասխանել»:
Այդ պահին ուշաթափվեց Հարութիկի մայրը, որին դատական կարգադրիչները ջուր եւ դեղ հասցրեցին: Վկայի հորը, որը գտնվում էր դահլիճում, աղմուկով մոտեցան ամբաստանյալների հարազատները եւ սկսվեց անկառավարելի վիճակ նիստերի դահլիճի տարբեր հատվածներում:
Կարդացեք նաև
![««Նախկին» անարդար համակարգին հաջորդող «աննախադեպ» համակարգը մնաց նույնքան անարդար. ԶՈՒ Լեյտենանտ Արտակ Նազարյանի մահվան [չ]բացահայտումը՝ 14 տարի անց»](https://www.aravot.am/wp-content/uploads/2024/01/Artak-Nazaryan-437x275.jpg "««Նախկին» անարդար համակարգին հաջորդող «աննախադեպ» համակարգը մնաց նույնքան անարդար. ԶՈՒ Լեյտենանտ Արտակ Նազարյանի մահվան [չ]բացահայտումը՝ 14 տարի անց»")
Կարգադրիչները սպառնում էին զանգել ոստիկանություն, իսկ ամբաստանյալների հարազատները մոտեցան անգամ ապակե պատին, սպառնում էին կոտրել այն:
Ապակե պատի ետեւում իր մորն ուշաթափված տեսնելով, հիմա էլ Հարութիկն էր փորձում ինչ-որ քայլեր ձեռնարկել:
Դատական նիստը հետաձգվեց եւ ակնհայտ նախադրյալ ստեղծվեց դռնփակ դատական նիստ անցկացնելու համար:
Ամբաստանյալների հարազատները չէին հանգստանում, իսկ վկան, ընդհանրապես դատարանի մուտքով դուրս չեկավ:
Տուժողի իրավահաջորդի ներկայացուցիչ Ռուբեն Մարտիրոսյանն այս ամենի մեղավորը համարեց զինվորական դատախազությանն ու ռազմական ոստիկանությանը:
Ռուզան ՄԻՆԱՍՅԱՆ
Տեսանյութը՝ Epress.am-ի
