Շիրակի մարզի մի շարք գյուղերում` Պեմզաշենում, Նահապետավանում, Գեղանիստում, Վահրամաբերդում, Բասենում, Գառնառիճում եւ այլուր, սպասվում են ՏԻՄ ընտրություններ: Այս ընտրություններն արտառոց են նրանով, որ գրեթե բոլոր գյուղապետարանների աշխատակիցները ձեւականորեն դուրս են եկել իրենց շեֆերի դեմ:
Ընտրական նոր օրենսգիրքը համայնքապետի պաշտոնի համար պարտադրում է մեկից ավելի թեկնածու. մրցակից չլինելու դեպքում՝ թեկնածուին պարզապես չեն գրանցում, հետեւաբար եւ գյուղապետերը գտել են ձեւը. իրենց աշխատակիցներին հորդորում, ձեւականորեն իրենց դեմ են հանում ու ընտրապայքարի կեսից ստիպում են ինքնաբացարկ հայտնել: Ավելին, մեր տեղեկություններով, գյուղապետերը վճարում են նաեւ իրենց դեմ թեկնածություն դնողների ինքնառաջադրման համար նախատեսված 100 000-150 000 դրամ գումարը:
Ամասիայի տարածաշրջանի Գառնառիճ գյուղը այս առումով ամենահետաքրքիրն է: Այստեղ արմատներով ախալքալաքցի, ՀՀԿ անդամ գյուղապետ Մանվել Ղազարյանի դեմ պայքարելու է նրա ՀՀԿ-ական փեսան` Վանիկ Մանուկյանը, որն աշխատում է իր զոքանչի ղեկավարած կառույցում` գյուղի դպրոցում որպես ուսուցիչ:
Նունե ԱՐԵՎՇԱՏՅԱՆ
