Պայմանագրային զինծառայող, սպա Արտակ Նազարյանի ինքնասպանության հասցնելու գործով Տավուշի մարզի ընդհանուր իրավասության դատարանի արտագնա նիստում, որն այսօր ընթանում է մայրաքաղաքի Շենգավիթ վարչական տարածքի դատարանի շենքում, դատավոր Սամվել Մարդանյանը մտավ խորհրդակցական սենյակ:
Նիստը, որը հետաձգվել էր մինչեւ ժ.14-00-ը՝ պաշտպան Ալվարդ Մնացականյանի դատարան չներկայանալու պատճառով, սկսվեց: Պաշտպանը եկավ: Դատարան ներկայացավ նաեւ ՀՀ զինդատախազի 16.01.2012թ. գրությամբ, ՊՆ քննչական ծառայության հատկապես կարեւորագույն գործերով բաժնի դատախազ Հայկ Հարոյանը:
Տուժողի իրավահաջորդի ներկայացուցիչ Ռուբեն Մարտիրոսյանը փորձեց ճշտել, թե դատախազը ծանո՞թ է գործին: Հայկ Հարոյանն ասաց, թե ծանոթ է գործի վարույթին՝ պատճենահանված գործի նյութերին:
Երբ Ռ.Մարտիրոսյանը փորձեց հարցերը շարունակել, նախագահողը նրան ընդհատեց, ասելով, թե դատախազի հարցաքննությամբ չեն զբաղված:
Կարդացեք նաև
Արտակ Նազարյանի քույրը՝ տուժողի իրավահաջորդ Ծովինար Նազարյանը բացարկ հայտնեց դատախազին, հայտարարելով, որ մեղադրանքը կեղծ է, եւ որ չի կարելի պաշտպանել այս կեղծ մեղադրանքը. «Իրականացվել է հանցագործության կեղծ սցենար»:
Իրավապաշտպան Ռուբեն Մարտիրոսյանը հայտարարեց, որ գործ ունենք սպանության հետ, իսկ դատավորը ասում էր, թե մահվան գործ է իր վարույթում, եւ ոչ թե՝ սպանության:
Նոր դատախազի ներգրավվելուն դեմ էին ամբաստանյալներ Հակոբ Մանուկյանի, Վահագն Հայրապետյանի, Մխիթար Մխիթարյանի, Հարութիկ Կիրակոսյանի, Ադիբեկ Հարությունյանի պաշտպաններն ու հենց իրենք՝ ամբաստանյալները: Իր գործընկերոջը փորձեց պաշտպանել գլխավոր դատախազությունից այս գործով մեղադրանքը պաշտպանող, դատախազ Հարություն Հարությունյանը: Նա ասաց, որ բազմադրվագ գործերով, եթե մեղադրողը գտնվի այլ դատական նիստի, մյուսը գոնե կարողանա մասնակցել եւ՝ «հասնի ճշմարտության»: Հավանաբար, մեղադրողը նկատի ուներ իր հնարավոր բացակայությունները բազմադրվագ մեկ այլ գործի հետ կապված՝ ճանապարհային ոստիկանության նախկին պետ Մարգար Օհանյանի գործով:
Իսկ Հայկ Հարոյանը կարողացավ ասել, որ կաշկանդվածություն չկա եւ որ «իր մասնակցությունից պարզ կդառնա, որ տարվել է օբյեկտիվ քննություն»:
Նախագահող դատավոր Սամվել Մարդանյանը անցել է խորհրդակցական սենյակ՝ դատախազի բացարկի հետ կապված որոշում կայացնելու:
Ի դեպ, վերջին շրջանում հաճախակի են նկատվում մեղադրանքի կողմի հակասությունները: Տուժողի իրավահաջորդի ներկայացուցիչների միջնորդություններին դեմ են լինում հենց իրենք՝ մեղադրանքը պաշտպանողները, իսկ փոխարենը նրանց միջնորդությունները պաշտպանում է պաշտպանական կողմը՝ ամբաստանյալներն ու նրանց պաշտպանները:
Ակնհայտ է, որ նախաքննությունից սկսած, լուրջ հակասությունները դատարան են փոխանցվում:
Ռուզան ՄԻՆԱՍՅԱՆ
