Aravot.am-ի հետ զրույցում Հայաստանում Գերմանիայի Դաշնային Հանրապետության դեսպան Հանս-Յոխեն Շմիդթը կարեւորելով լեզուների իմացությունը ասաց. «Գնալով ավելի ու ավելի սերտաճող մեր աշխարհում, համաշխարհայնացման միտումների պայմաններում անգլերենի գիտելիքներն անհրաժեշտ են յուրաքանչյուրին: Ամեն հաջորդ օտար լեզու, եւ հատկապես գերմաներենը` որպես Եվրամիությունում ամենից շատ տարածված մայրենի լեզու, մեծ առավելություն է»:
Դեսպանը նաեւ հավելեց, որ անցյալ տարի գերմանական կողմից ընդհանուր թվով 140 կրթաթոշակ է տրամադրվել տարբեր մասնագիտական ոլորտների ուսանողների եւ գիտնականների: Պարոն Շմիդթը նաեւ նշեց, որ հայկական կողմի հետ այժմ մտածում են միջկառավարական համատեղ կրթաթոշակներ հիմնելու մասին: «Ցավոք, «Լույս» հիմնադրամը ցայսօր կրթաթոշակներ չի տրամադրում գերմանական որեւէ բուհում սովորող հայ երիտասարդի: Գերմանական բուհերը բարձր մակարդակ ունեն եւ կցանկանային «Լույս» հիմնադրամի գործընկեր բուհ դառնալ: Հայկական բուհերի շրջանում քաջածանոթ են ճարտարապետության ոլորտում Գերմանիայի մեծ փորձառությանը, հատկապես` Մագդեբուրգի համալսարանի միջոցով: Ինֆորմացիոն տեխնոլոգիաների ոլորտում արդյունավետ համագործակցություն է ծավալվել Երեւանի պետական եւ Ռոստոկի համալսարանների միջև: Գերմանական կողմի հետ երկար տարիների համագործակցության փորձ ունի Մատենադարանը` հնագույն ձեռագրերի եւ գրքերի վերանորոգման ոլորտում: Այս համագործակցությունը պետք է շարունակել»,-փաստեց նա:
Իսկ զբոսաշրջիկի հայացքով գնահատելով հայերին եւ Հայաստանը, պարոն Շմիդթը հետեւյալ կարծիքը հայտնեց. «Հայաստանում շատ գեղեցիկ զբոսաշրջային վայրեր կան` Հաղպատ, Օձուն, Սանահին… Հայաստանի օդանավակայանն ամենատպավորիչն է Հարավային Կովկասում: Բայց հարկ է նպատակասլաց կերպով զարգացնել նաեւ զբոսաշրջային մյուս ենթակառուցվածքները` զբոսաշրջային վայրերն առավել հրապուրիչ դարձնելու համար: Պետք է բարելավվեն տեսարժան վայրեր տանող ճանապարհները, նաեւ այդ վայրերի այլ կարևոր ենթակառուցվածքներ: Մեկ վերջին դիտարկում եւս. Հայաստանն իր հնագույն եւ հարուստ մշակույթով կարող է շահեկանորեն ներկայացնել եւ գովազդել իրեն: Շատ լավ կլիներ, եթե հաջողվեր Գերմանիայում եւս կազմակերպել ցուցահանդեսներ, ինչպես օրինակ` Ֆրանսիայում հաջողությամբ կազմակերպված «Սրբազան Հայաստան՚» ցուցահանդեսն էր»:
Գոհար ՀԱԿՈԲՅԱՆ
Կարդացեք նաև
Դեսպանի հետ հարցազրույցը՝ վաղվա տպագիր «Առավոտում»:
