Այսօր ՀՀ արտգործնախարար Էդվարդ Նալբանդյանն ասուլիսում որպես 2011-ի ձեռքբերում, նշեց նաեւ Ֆրանսիայի ԱԺ-ի կողմից ընդունված Հայոց ցեղասանության ժխտումը քրեականացնող օրինագիծը:
Aravot.am-ի հետ զրույցում մենք նախարարին փոխանցեցինք, որ թուրքագետներն այս առնչությամբ վստահեցնում են, թե դա կրակոց էր, որը բացարձակ մեր կառավարության հրացանից չէր, եւ, որ այդտեղ ՀՀ արտգործնախարարությունը որեւէ դերակատարություն չուներ: Նախարարը խնդրեց զգույշ լինել եւ այս առնչությամբ ձեռնպահ մնաց որեւէ մեկնաբանություն տալ, քանի որ այդ նախագիծն ընդգրկված է Սենատի օրակարգում եւ ցանկացած անզգույշ խոսք կարող է վնասել գործընթացին:
Ասուլիսի ընթացքում մեկնաբանելով օրինագծի ընդունման շուրջ Թուրքիայի հայտարարությունները՝ պարոն Նալբանդյանը նշեց. «Այն փաստարկները, որոնք հնչում են թուրքական կողմից, ես կասեի` դրանք բավական, մեղմ ասած, թույլ, սին փաստարկներ են: Երբ ասում են, որ այս գործընթացը կամ օրենքը կարող է խանգարել հայ-թուրքական հարաբերությունների կարգավորմանը, նախեւառաջ` մեկը մյուսի հետ կապ չունի, իսկ եթե ինչ-որ մի բան խանգարում է հայ-թուրքական հարաբերությունների կարգավորմանը, սա հայտնի է միջազգային հանրությանը` դա թուրքական կողմի կեցվածքն է եւ այդ պատճառով է, որ ասվում է` թուրքական կողմում է գտնվում գնդակը: Իսկ այն փաստարկները, որոնք հնչում են, թե իբրեւ Թուրքիայում ինչ-որ տնտեսական շահեր կան եւ եթե այս օրենքն ընդունվի, ուրեմն կարող է խոչընդոտել նրան, որ Թուրքիան ինչ-ինչ դեր կարող էր խաղալ տարածաշրջանային այս կամ այն հարցում, կարծում եմ, որ այստեղ մի քիչ կոռուպցիայի հոտ է գալիս անգամ, այսինքն` ոչ միայն շանտաժ է, այլեւ ուզում են ինչ-որ մի բանով առնել: Բայց նախեւառաջ, այս օրենքի նախագիծն ի կատարումն է Եվրամիության խորհրդի` 2008-ի նոյեմբերի 28-ին ընդունած շրջանակային որոշման, եւ չեմ կարծում, որ համամարդկային արժեքները կարող են ստորադասվել ինչ-այլ փաստարկներով, հատկապես այն կարգի, որոնք հնչեցվում են թուրքական կողմից»:
Հռիփսիմե ՋԵԲԵՋՅԱՆ
Կարդացեք նաև
