Ինչպես արդեն նշել ենք` ուրբաթ օրը` հունվարի 13–ին, «Առավոտը» եղավ Քաջարանում` տեղում ծանոթանալու Զանգեզուրի պղնձամոլիբդենային կոմբինատի եւ Քաջարան գյուղի բնակիչների միջեւ ծագած վեճին, սեփական աչքով տեսնելու իրավիճակը: «Դուք ագենտներ եք: Ինչի՞ եք առանց զգուշացնելու եկել: Ինչի՞ չեք ասել, նոր եկել: Մեր գյուղն ա, պիտի ասեիք, նոր գայիք»,- այսպես մեզ դիմավորեցին Քաջարան գյուղում, երբ անսպասելի մտանք, տեսնելու, թե իրականում քանի՞ հոգի է ապրում այդ գյուղում: Գյուղացիներից մեկի նյարդերը նույնիսկ այնքան տեղի տվեցին, որ փորձեց Գագիկ Շամշյանից խլել լուսանկարչական ապարատը, հարվածել նրան:
Բարկության պատճառն ակնհայտ էր. իրականությանը բացարձակապես չէր համապատասխանում ոչ միայն գյուղապետ Ռաֆիկ Աթայանի «հարյուր հիսուն ընտանիք ա ապրում» հայտարարությունը, այլեւ մյուս գյուղացիների թվերը`«դե, մի քառասուն», «երեւի մի երեսուն կլինենք, էլի»: Գյուղապետը ստիպված էր զանգել եւ մոտակա տարածքներից կանչել Քաջարան գյուղում գրանցված, բայց չապրող մարդկանց:
Մեր այցն անսպասելի էր նաեւ Զանգեզուրի պղնձամոլիբդենային կոմբինատի տնօրեն Մաքսիմ Հակոբյանի համար: Պարզվեց, որ վիրահատությունից հետո դեռ չապաքինված տնօրենը նաեւ մրսած է, ջերմում է: Այդուհանդերձ, նա որոշեց այնուամենայնիվ գալ կոմբինատ եւ հարցազրույց տալ «Առավոտին»` ներկայացնելով իր տեսակետը, իր դիրքորոշումը:
