Ռեժիսոր Հրաչ Քեշիշյանն օրերս հաստատել էր այն տեղեկությունը, որ, «Սի էս» մեդիահոլդինիգը, որի մեջ գործում են «Արմենիա», «Արմնյուզ» եւ «ATV» հեռուստաընկերությունները՝ վերանվանվում է «Պանարմենիան» եւ վերջինիս գլխավոր պրոդյուսեր է նշանակվելու ինքը:
Այսպիսով, փաստորեն, թեեւ անուղղակի, բայց նաեւ հաստատվել է վաղուց հայտնի այն իրողությունները, որ վերոնշյալ հեռուստաընկերությունները պատկանում են մեկ սեփականատիրոջ: Մինչդեռ «Հեռուստատեսության եւ ռադիոյի մասին» ՀՀ օրենքի 18 հոդվածը (հակամենաշնորհային երաշխիք) սահմանում է.
1. Իրավաբանական անձինք կարող են ունենալ եթերային հեռարձակում իրականացնող ոչ ավելի, քան մեկ հեռուստաընկերության եւ մեկ ռադիոընկերության լիցենզիա:
2. Ֆիզիկական անձինք եւ նրանց հետ փոխկապակցված անձինք կարող են դառնալ ոչ ավելի, քան եթերային հեռարձակում իրականացնող լիցենզավորված երկու անձի (մեկ հեռուստաընկերության եւ մեկ ռադիոընկերության) հիմնադիր եւ (կամ) մասնակից:
Կարդացեք նաև
Այս առիթով Aravot.am-ը փորձեց ստանալ Հեռուստատեսության եւ ռադիոյի ազգային հանձնաժողովի նախագահ Գրիգոր Ամալյանի մեկնաբանությունները: Վերջինս գերադասեց գրավոր պատասխանել: Հետեւաբար, օրենքով սահմանված հնգօրյա ժամկետում խոստանում ենք ներկայացնել պարոն Ամալյանի մեկնաբանությունները` ստանալուն պես:
Նելլի ԳՐԻԳՈՐՅԱՆ
